وتان قورعاۋشى كۇنى قارساڭىندا وقۋ-اعارتۋ ءمينيسترى عاني بەيسەمبايەۆ مەكتەپتەردە العاشقى اسكەري جانە تەحنولوگيالىق دايىندىق پانىنەن ساباق بەرەتىن 40 ءمۇعالىمدى ۆەدومستۆولىق ناگرادالارمەن ماراپاتتادى.
ءىس-شاراعا قورعانىس ءمينيسترىنىڭ ورىنباسارى قانىش ابۋباكىروۆ قاتىستى، دەپ حابارلايدى aqshamnews.kz.
مينيستر ۇستازداردى مەرەكەمەن قۇتتىقتاپ، جاستاردى ازاماتتىق جانە پاتريوتتىق قۇندىلىقتارعا تاربيەلەۋدە ولاردىڭ ماڭىزدى ءرول اتقاراتىنىن اتاپ ءوتتى. سونىمەن قاتار، وقۋ-اعارتۋ مينيسترلىگى مەن قورعانىس مينيسترلىگى بىرلەسىپ سپورت سەكسيالارىن دامىتۋ، ءااتد كابينەتتەرىن جابدىقتاۋ، اسكەري بولىمدەرگە ەكسكۋرسيالار ۇيىمداستىرۋ، «جاس سارباز» قوزعالىسىن قولداۋ جانە كادرلار دايارلاۋ ساپاسىن ارتتىرۋ باعىتىندا جۇمىس جۇرگىزىپ جاتقانىن ايتتى.
«قازىرگى تاڭدا ەلىمىزدىڭ مەكتەپتەرىندە 5 مىڭعا جۋىق ءااتد ءپانىنىڭ ءمۇعالىمى قىزمەت ەتۋدە. بۇل ءپان جاس ۇرپاقتى تارتىپكە، جاۋاپكەرشىلىككە باۋلىپ، اسكەري قىزمەت پەن وتانعا دەگەن قۇرمەتتى قالىپتاستىرۋدا ماڭىزدى ءرول اتقارادى. سىزدەر – ەلىن سۇيەتىن، بەيبىتشىلىكتى قادىرلەي بىلەتىن وسكەلەڭ ۇرپاقتى تاربيەلەۋگە ەلەۋلى ۇلەس قوسىپ، ەرلىك پەن ازاماتتىق بورىشتىڭ ءمانىن ۇعىندىرىپ كەلەسىزدەر»، – دەدى عاني بەيسەمبايەۆ.
ءمينيستردىڭ ايتۋىنشا، وسكەلەڭ ۇرپاقتىڭ رۋحاني-ادامگەرشىلىك تاربيەسى مەن ازاماتتىق ۇستانىمىن قالىپتاستىرۋ – ءبىلىم بەرۋ سالاسىنداعى مەملەكەتتىك ساياساتتىڭ نەگىزگى باسىمدىقتارىنىڭ ءبىرى.
كاسىبي شەبەرلىگى مەن تاربيە ىسىنە قوسقان ۇلەسى ءۇشىن 9 پەداگوگ «ەڭبەك ارداگەرى» مەدالىمەن، ال 30-دان استام ءمۇعالىم «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىمەن ماراپاتتالدى.
جيىن سوڭىندا مينيستر ۇستازدارعا ادال ەڭبەگى ءۇشىن العىس ءبىلدىرىپ، پەداگوگ مارتەبەسىن كوتەرۋ مەن قولداۋدىڭ مينيسترلىك جۇمىسىنىڭ نەگىزگى باعىتتارىنىڭ ءبىرى ەكەنىن اتاپ ءوتتى.