الماتى قالاسىنداعى ورتالىق ارمياشىلار ۇيىندە ۇلى وتان سوعىسىنداعى جەڭىستىڭ 80 جىلدىعىنا ارنالعان "وتان داۋسى" اتتى اسكەري-پاتريوتتىق ءان-بي بايقاۋى ءوتتى. بۇل شاراعا قالا مەكتەپتەرىنىڭ وقۋشىلارى قاتىسىپ، ءوز ونەرلەرىن ورتاعا سالدى.
شارا سالتاناتتى تۇردە قازاقستاننىڭ انۇرانىمەن اشىلىپ، "كەربەز گۇلدەر" بيشىلەر توبىنىڭ "قازاعىم-اۋ" بيىمەن جالعاستى. بايقاۋدىڭ ماڭىزدىلىعى تۋرالى ق ر قارۋلى كۇشتەرى اسكەري-پاتريوتتىق ورتالىعى باسشىسىنىڭ ورىنباسارى، گەنەرال يۆان پانفيلوۆتىڭ جيەن-نەمەرەسى الۋا بايقاداموۆا اتاپ ءوتتى:
"ۇلى وتان سوعىسىنداعى جەڭىستىڭ جاقىنداۋىنا قازاقستاندىقتاردىڭ قوسقان ۇلەسى ولشەۋسىز. بۇل بايقاۋ جاستارعا ەرلىكتى ناسيحاتتاۋدىڭ جانە وتانسۇيگىشتىك سەزىمدى ۇيالاتۋدىڭ ءبىر جولى."
الۋا بايقاداموۆا بايقاۋدىڭ ءادىلقازىلار القاسىنىڭ ءتورايىمى بولدى. ونىڭ قۇرامىندا ءانشى ايجان نۇرماعامبەتوۆا، سكريپكاشى ءجاميلا سەركەبايەۆا جانە حورەوگراف نيزام كارىموۆ سەكىلدى ونەر شەبەرلەرى بار.
الماتى قالالىق ءبىلىم باسقارماسى دەنە تاربيەسى جانە سپورت وقۋ-پراكتيكالىق ورتالىعىنىڭ ديرەكتورى باقتيار ەلەمەسوۆ:
"بايقاۋدىڭ ماقساتى – جاس ونەرپازداردى انىقتاۋ عانا ەمەس، ولاردىڭ بويىندا وتانشىلدىق رۋحتى قالىپتاستىرۋ،" – دەپ ءبولىستى.
بايقاۋ بارىسىندا وقۋشىلار وزدەرىنىڭ ەرەكشە قابىلەتتەرىمەن كوزگە ءتۇسىپ، اسەرلى اندەر مەن بي قويىلىمدارىن ۇسىندى. جەڭىمپازدار ديپلومدارمەن ماراپاتتالدى.
