پارلامەنت سايلاۋى - پرەزيدەنت ۇسىنعان ساياسي رەفورمالاردىڭ جالعاسى.
ويتكەنى، بۇعان دەيىن كونستيتۋسياعا وزگەرىستەر مەن تولىقتىرۋلار ەنگىزىلدى. سەنات پەن ءماجىلىستىڭ قىزمەتى قايتا قارالدى. ەندى ءماجىلىس پەن ءماسليحات دەپۋتاتتارىن سايلاۋ ساياسي رەفورمالاردى جالعاستىرۋى ءتيىس، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
وسىعان دەيىن ەلىمىزدە 7 ءماجىلىس سايلاۋى ءوتتى. العاشقى ۇشەۋى ارالاس جۇيەمەن بولسا، 2007 جىلدان بەرى دەپۋتاتتار پارتيالىق ءتىزىم بويىنشا سايلانىپ كەلدى. ال بۇل جولعى ساياسي الامان جاڭا ءتارتىپ بويىنشا وتەدى. ياعني ءماجىلىس دەپۋتاتتارىنىڭ 70 پايىزى پارتيالىق ءتىزىم ارقىلى، ال قالعان 30 پايىزى تىكەلەي سايلانادى.
وبلىستار مەن رەسپۋبليكالىق ماڭىزى بار قالالارداعى ءماسليحاتتار سايلاۋى دا ارالاس ۇلگىمەن وتەدى. ال اۋدان-قالالارداعى ءماسليحات دەپۋتاتتارى تولىعىمەن تىكەلەي سايلانادى. وسىلايشا ەل اراسىندا بەدەلى بار جاڭا تۇلعالاردىڭ ساياساتقا كەلۋىنە جول اشىلىپ وتىر. كونستيتۋسيالىق رەفورما اياسىندا ساياسي پارتيالاردى تىركەۋ ءراسىمى جەڭىلدەدى. ونىڭ شەگى 4 ەسە، 20 مىڭنان 5 مىڭ ادامعا ازايدى.وڭىرلەردەگى وكىلدەر سانى 600-دەن 200 ادامعا تومەندەدى. پارتيا قۇرۋ ءۇشىن ازاماتتاردىڭ باستاماشىل توبىنىڭ ەڭ تومەنگى سانى ۇشتەن بىرگە، ياعني 1000-نان 700 ادامعا ازايدى. سونىمەن بىرگە سايلاۋ بيۋللەتەنىنە «بارىنە قارسىمىن» دەگەن باعان ەنگىزىلدى.
پارتيالاردىڭ ماجىلىسكە وتۋىنە قاجەتتى داۋىستىڭ تومەنگى شەگى 7-دەن 5 پايىزعا دەيىن ازايدى. سايلاۋ ۇدەرىسىنە قوعامنىڭ ءتۇرلى وكىلدەرىن بارىنشا تارتۋ ءۇشىن زاڭناماعا وزگەرىستەر ەنگىزىلدى. مىسالى، دەپۋتاتتىق مانداتتىڭ 30 پايىزىن ايەلدەرگە، جاستارعا جانە ەرەكشە قاجەتتىلىگى بار ازاماتتارعا ءبولۋ زاڭ جۇزىندە بەكىتىلدى. بۇل كەزەكتەن تىس سايلاۋ بولعانىمەن، ونىڭ وتەتىن مەرزىمى جارتى جىل بۇرىن بەلگىلى بولدى. بىلتىر، قىركۇيەكتەگى جولداۋىندا پرەزيدەنت ءماجىلىس پەن ءماسليحات سايلاۋى وتەتىنىن ايتتى.