وسى عاسىردىڭ ەكىنشى جارتىسىندا مۇسىلماندار سانى حريستيانداردى باسىپ وزادى

وتكەن جىلدىڭ ءساۋىر ايىنىڭ باسىندا ءيسى مۇسىلمان قاراسى، ياعني، كۇللى الەمدەگى مۇسىلماندار سانى ەكى ميلليارد ادامنان اسقان، دەپ حابارلايدى aqshamnews.kz.

مۇنداي مالىمەت Global Muslim Population ۆەب-سايتىندا كەلتىرىلگەن. بۇل جايىندا islam.kz پورتالى ءوز كەزەگىندە Morocco World News اگەنتتىگىنە ءجون سىلتەگەن IslamNews  اقپارات كوزىنە سىلتەمە جاساي وتىرىپ ءمالىم ەتەدى.

وسىلايشا مۇسىلماندار سانى 8 ملرد-تان كوپ ادامزاتتىڭ 25%-نان اسقان. مۇسىلماندار بۇگىندە حريستيانداردان كەيىن ەكىنشى ورىندا تۇر. سانى جاعىنان. 

 Pew Research Center ورتالىعىنىڭ 2017 جىلعى بولجامىنا سەنسەك، وسى عاسىردىڭ ەكىنشى جارتىسىندا مۇسىلماندار سانى حريستيانداردى باسىپ وزادى. 2035 جىلدىڭ وزىندە باسقا نانىم-سەنىم وكىلدەرىنە قاراعاندا دۇنيەگە كەلەتىن بالالار اراسىندا مۇسىلماندار ءبىرىنشى ورىنعا شىعادى.

مۇسىلمانداردىڭ دەنى باسقا قۇرلىقتارمەن سالىستىرعاندا ازيا ايماعىندا ەڭ كوپ شوعىرلانعان – الەمدەگى مۇسىلمانداردىڭ 60%-دان استامى تۇرادى. ال مۇسىلماندار سانى ەڭ كوپ ءوسىپ كەلە جاتقان،  مۇسىلمان ەمەستەر تۇراتىن وڭىرگە ەۋروپا جاتقىزىلعان. بۇعان ميگراسيالىق پروسەستەر سەبەپ بولىپ وتىر. بۇل باعىتتاعى زەرتتەۋ ناتيجەسىنە سايكەس مۇسىلماندار سانى وزگە نانىم-سەنىم وكىلدەرىنە قاراعاندا 70% شاپشاڭ ءوسىپ كەلە جاتىر. بۇعان مۇسىلمان ەلدەرىندەگى تۋۋ كورسەتكىشىنىڭ جوعارى بولۋى ىقپال ەتۋدە.