وڭتۇستىك كورەيانىڭ بۇرىنعى پرەزيدەنتى يۋن سوك ءولدىڭ جۇبايى تۇرمەگە سوتتالدى. وعان قىمبات سىيلىقتار العانى ءۇشىن ايىپ تاعىلعان، - دەپ حابارلايدى aqshamnews.kz Yonhap اگەنتتىگىنە سىلتەمە جاساپ.
Chanel سومكەلەرى، Graff القاسى جانە ۇكىم
سەۋل سوتى كيم گون ءحيدى 1 جىل 8 ايعا باس بوستاندىعىنان ايىرۋعا ۇكىم شىعاردى. سوت ونى بيزنەسكە قاتىستى جەڭىلدىكتەر الۋعا ۇمتىلعان بىرىگۋ شىركەۋى (Unification Church) وكىلدەرىنەن قىمبات زاتتار العانى ءۇشىن كىنالى دەپ تانىدى.
اڭگىمە Chanel سومكەسى مەن Graff اشەكەي القاسى تۋرالى بولىپ وتىر. كيم بۇل سىيلىقتاردى 2022 جىلعى شىلدەدە العان. سوت بۇل سىيدىڭ بيزنەس مۇددەلەرىنە قولداۋ كورسەتۋ تۋرالى وتىنىشتەرىمەن بايلانىستى بولعانىن انىقتادى.
سونىمەن قاتار، بۇعان دەيىن الىنعان تاعى ءبىر Chanel سومكەسىن سوت پارا رەتىندە تانىمادى، سەبەبى سول كەزەڭدە سىيلىق بەرگەن تاراپتان ناقتى تالاپتار قويىلعانى دالەلدەنبەگەن.
سەۋلدىڭ ورتالىق اۋداندىق سوتى كيم گون ءحيدى Deutsch Motors كومپانياسى اكسيالارىنىڭ باعامىن قولدان ءوسىرۋ ىسىنە قاتىسى بار دەگەن ايىپتان، سونداي-اق، ساياسي قورلار تۋرالى زاڭدى بۇزدى دەگەن كۇدىكتەن اقتادى.
تەرگەۋ دەرەگىنشە، ول 2010–2012 جىلدارى اكسيالارمەن بايلانىستى ايلا-شارعى سحەماسىنا قاتىسقان. الايدا سوت ونىڭ تىكەلەي قاتىسۋىن دالەلدەيتىن ايعاقتار جەتكىلىكسىز دەگەن قورىتىندىعا كەلدى.
سونداي-اق، سوت كيم مەن ونىڭ جۇبايىنا 2022 جىلعى پرەزيدەنت سايلاۋى قارساڭىندا تەگىن الەۋمەتتىك ساۋالنامالار بەرىلگەنىن مويىندادى، ءبىراق مۇنى ەكونوميكالىق پايدا رەتىندە باعالامادى: سەبەبى ول ساۋالنامالار تەك سولارعا ارناپ جاسالماعان.
تاركىلەۋ جانە اپەللياسيا
سوت كيمنەن 12،8 ميلليون ۆوندى (شامامەن 4،47 ميلليون تەڭگە) تاركىلەۋدى دە شەشتى. وسىلايشا كيم گون حي مەن بۇرىنعى پرەزيدەنت يۋن سوك ءول ەل تاريحىندا قىلمىستىق ىستەر بويىنشا ناقتى تۇرمە جازاسىن العان العاشقى پرەزيدەنتتىك جۇپ اتاندى.
ارنايى پروكۋرور كومانداسى ۇكىمدى تىم جۇمساق دەپ اتاپ، شاعىمداناتىنىن مالىمدەدى. ال كيمنىڭ ادۆوكاتتارى دا اپەللياسيا بەرۋ مۇمكىندىگىن قاراستىرىپ جاتقانىن ايتتى.
يۋن سوك ءول ءىسى
ەسكە سالايىق، بۇرىنعى پرەزيدەنت يۋن سوك ءول 2025 جىلعى 4 ساۋىردە ەلدە اسكەري جاعداي ەنگىزۋ ارەكەتى ءساتسىز اياقتالعاننان كەيىن قىزمەتىنەن شەتتەتىلگەن ەدى. سول كەزدە العاش رەت ەل تاريحىندا قىزمەتتەگى پرەزيدەنتكە قاتىستى قاماۋعا الۋ وردەرى شىعارىلعان.
يۋن سوك ءول بۇعان دەيىن 2024 جىلى اسكەري جاعداي ەنگىزۋگە بايلانىستى ءىس بويىنشا 5 جىلعا سوتتالعان. ءقازىر ول باسقا دا قىلمىستىق ىستەر بويىنشا تەرگەلىپ جاتىر، ونىڭ ىشىندە بۇلىكتى باسقاردى دەگەن ايىپ تا بار.