وسكەمەن قالاسىندا ءۇشىنشى كۇن قاتارىنان اۋانىڭ قولايسىز مەتەورولوگيالىق جاعدايلارىنىڭ ەكىنشى دارەجەسى ساقتالۋىنا بايلانىستى مەكتەپ وقۋشىلارى ۋاقىتشا قاشىقتان وقىتۋ فورماتىنا كوشتى، - دەپ حابارلايدى Aqshamnews.kz.
بۇل تۋرالى قالالىق ءبىلىم باسقارماسى مالىمدەگەن.
قابىلدانعان شەشىمگە سايكەس، 30 قاڭتاردان باستاپ ءبىرىنشى جانە ەكىنشى اۋىسىمدا ءبىلىم الاتىن وقۋشىلار ونلاين فورماتتا وقيدى. مۇنداي شارا بالالاردىڭ دەنساۋلىعىنا تونەتىن ءقاۋىپتىڭ الدىن الۋ ماقساتىندا قابىلدانعان.
مامانداردىڭ ايتۋىنشا، قولايسىز اۋا رايى جاعدايىندا زياندى لاستاۋشى زاتتار اتموسفەرانىڭ تومەنگى قاباتىندا ۇزاق ۋاقىت ساقتالىپ، قالاداعى اۋا ساپاسىنىڭ ناشارلاۋىنا اكەلەدى. بۇل اسىرەسە بالالاردىڭ تىنىس الۋ جۇيەسىنە كەرى اسەر ەتۋى مۇمكىن.
قولايسىز مەتەورولوگيالىق جاعدايلار كەزىندە ەڭ باستى باسىمدىق – وقۋشىلاردىڭ قاۋىپسىزدىگى مەن دەنساۋلىعى. وسىعان بايلانىستى مەكتەپ وقۋشىلارىن ۋاقىتشا قاشىقتان وقىتۋعا كوشىرۋ تۋرالى شەشىم قابىلداندى، - دەپ مالىمدەدى قالالىق ءبىلىم باسقارماسى.
بەكىتىلگەن وقۋ كەستەسىنە سايكەس ساباقتار ونلاين رەجيمدە وتكىزىلىپ، ءبىلىم بەرۋ ۇدەرىسى تولىق كولەمدە جالعاسۋدا. سونىمەن قاتار اتا-انالاردان قالاداعى اۋا ساپاسى جاقسارعانعا دەيىن جاۋاپتى قىزمەتتەردىڭ رەسمي حابارلامالارى مەن مامانداردىڭ ۇسىنىستارىن قاتاڭ ساقتاۋ سۇرالدى.