كەيدە اۋىر جۇمىس اپتاسىنان كەيىن، باسشىلىقپەن بولعان كەلىسپەۋشىلىكتەن سوڭ نەمەسە دەمالىستان قايتا ورالعاندا "جۇمىستان كەتەمىن"دەگەن وي ءجيى ايتىلادى. الايدا بۇل ويدى ناقتى ارەكەتكە اينالدىرۋعا كوپ ادام تاۋەكەل ەتە بەرمەيدى. كوبىنە ءبارى ءسوز جۇزىندە نەمەسە ىشكى ۋادەمەن عانا شەكتەلەدى. بۇل ءسوزدىڭ استارىندا نە جاتىر؟ ماسەلەنىڭ ءمانىن Aqshamnews.kz ءتىلشىسى انىقتاپ كوردى.
پيروگوۆ ۋنيۆەرسيتەتىنىڭ مامانى ۆەرا نيكيشينانىڭ ايتۋىنشا، جۇمىستان كەتۋ تۋرالى وي مەن ناقتى شەشىم قابىلداۋ – مۇلدە ەكى بولەك نارسە. ادامدار كەي جاعدايدا "كەتەمىن" دەگەن ءسوزدى ءوزىن-وزى الداۋ نەمەسە ىشكى نارازىلىقتى ۋاقىتشا باسۋ ءۇشىن قولدانۋى مۇمكىن. ياعني، شىن مانىندە ولار جۇمىستان كەتۋگە دايىن بولمايدى.
مامان جۇمىس ورنىن اۋىستىرۋ تۋرالى شەشىم ەموسياعا نەگىزدەلمەۋى كەرەگىن ايتادى. مۇنداي ماڭىزدى قادام دەمالىستان كەيىنگى كۇيزەلىس پەن مەرەكەلىك كۇندەردەن سوڭعى جالقاۋلىققا نەمەسە ءبىر رەتتىك جانجالعا بايلانىستى قابىلدانباۋى ءتيىس. كەرىسىنشە، ادام ءوز جۇمىسىن سالقىنقاندى باعالاپ، ونىڭ بارلىق ارتىقشىلىقتارى مەن كەمشىلىكتەرىن تارازىلاپ، ناقتى نە نارسە قاناعاتتاندىرمايتىنىن جانە جۇمىس ورنىن اۋىستىرۋ قانداي سالدارعا اكەلۋى مۇمكىن ەكەنىن ءتۇسىنۋى قاجەت.
كوپ جاعدايدا جۇمىستان كەتكىسى كەلەتىندەي كورىنەتىن نيەتتىڭ ارتىندا شىنايى سەبەپ جاتادى. دەمالىس پەن مەرەكە كۇندەرى ادامعا كاسىبي كۇيزەلىستەن الىستاپ، تىنىعۋعا مۇمكىندىك بەرەدى. الايدا قايتادان جۇمىس ىرعاعىنا ورالۋ كوپشىلىككە وڭاي سوقپايدى. وسى ىشكى قارسىلىق پەن شارشاۋ سەزىمى كەيدە "جۇمىستان كەتەمىن" دەگەن ويمەن بۇركەمەلەنۋى مۇمكىن.
سوندىقتان ماماندار ماڭىزدى شەشىم قابىلداماس بۇرىن ءوز باسىمدىقتارىڭىزدى ايقىنداپ، ەموسيا باسىلعان سوڭ عانا ناقتى قادام جاساۋعا كەڭەس بەرەدى.