قازاقستان رەسپۋبليكاسى كولىك مينيسترلىگىنىڭ ازاماتتىق اۆياسيا كوميتەتىنىڭ ءتوراعاسى سالتانات تومپييەۆا حالىقارالىق ازاماتتىق اۆياسيا ۇيىمىنىڭ (يكاو) باس حاتشىسى حۋان كارلوس سالازاردىڭ شەشىمىمەن يكاو-نىڭ عالامدىق ەلشىلەر باعدارلاماسى اياسىندا ەلشى بولىپ تاعايىندالدى، - دەپ حابارلايدى Aqshamnews.kz.
بۇل تاعايىنداۋ يكاو تاراپىنان قازاقستان رەسپۋبليكاسىنا كورسەتىلگەن جوعارى سەنىمدى بىلدىرەدى ءارى ەلدىڭ حالىقارالىق ازاماتتىق اۆياسيا كۇن ءتارتىبىن ىلگەرىلەتۋگە قوسقان ۇلەسىنىڭ مويىندالۋى بولىپ تابىلادى.
قازاقستان وكىلى يكاو-نىڭ 56 مەملەكەتتى بىرىكتىرەتىن ەۋروپالىق جانە سولتۇستىك اتلانتيكالىق وڭىرلىك بيۋروسى (EUR/NAT) شەڭبەرىندە ىرىكتەلدى. قازاقستاننىڭ تاڭدالۋى ەلدىڭ يكاو-نىڭ 2026–2050 جىلدارعا ارنالعان ستراتەگيالىق جوسپارىندا ايقىندالعان باسىمدىقتاردى ىسكە اسىرۋداعى بەلسەندى ءارى ءتيىمدى ءرولىن كورسەتەدى.
يكاو ەلشىسى رەتىندەگى قىزمەتىندە سالتانات تومپييەۆا ازاماتتىق اۆياسيانى دامىتۋدىڭ نەگىزگى باعىتتارى بويىنشا، اتاپ ايتقاندا اۆياسيا سالاسىنىڭ ورنىقتى ءوسۋىن قامتاماسىز ەتۋ، بىلىكتى اۆياسيا ماماندارىن دايارلاۋ جانە تارتۋ، سونداي-اق سالاداعى ايەلدەر مەن جاستاردىڭ قاتىسۋىن كەڭەيتۋ ماسەلەلەرى بويىنشا ءتۇسىندىرۋ جۇمىستارىن ارتتىرۋعا ۇلەس قوساتىن بولادى.
اتالعان قىزمەت ەرىكتى نەگىزدە جانە بىرىككەن ۇلتتار ۇيىمى مەن يكاو-نىڭ تاۋەلسىزدىك، بەيتاراپتىق جانە ەتيكا قاعيداتتارىن قاتاڭ ساقتاي وتىرىپ جۇزەگە اسىرىلادى.
قازاقستان رەسپۋبليكاسى كولىك مينيسترلىگى بۇل تاعايىنداۋ قازاقستاننىڭ جاھاندىق ازاماتتىق اۆياسيا جۇيەسىندەگى بەلسەندى ءرولىن، سونداي-اق ورنىقتى دامۋ، ينكليۋزيۆتىلىك جانە ادامي كاپيتالدى دامىتۋ سالاسىنداعى حالىقارالىق باستامالارعا بەرىك ۇستانىمىن راستايتىنىن اتاپ وتەدى.