قاسىم-جومارت توقايەۆقا 6 ملن 456 مىڭ 392 سايلاۋشى نەمەسە ولاردىڭ 81،31%-ى داۋىس بەرگەن.
قازاقستاننىڭ ورتالىق سايلاۋ كوميسسياسى پرەزيدەنت سايلاۋىنىڭ الدىن الا ناتيجەسىن جاريالادى، دەپ حابارلايدى Almaty-akshamy.kz.
ورتالىق سايلاۋ كوميسسياسىنىڭ ءتوراعاسى نۇرلان ءابدىروۆتىڭ ايتۋىنشا، قازىرگى ۋاقىتتا ەل وڭىرلەرى مەن شەت ەلدەردەگى سايلاۋ ۋچاسكەلەرىندە داۋىستاردى ساناۋ اياقتالدى. كەشە كۇنى بويى ونلاين رەجيمدە وڭىرلەردىڭ جەدەل دەرەكتەرى نەگىزىندە وسك قازاقستاندىقتاردىڭ داۋىس بەرۋگە قاتىسۋىنىڭ بەلگىلى ءبىر ۋاقىتتاعى جاعدايىن حابارلاپ وتىردى. 9 بريفينگ ءوتىپ، اقپارات شۇعىل بەرىلىپ وتىردى.
وسىلايشا وسك ءتوراعاسىنىڭ ايتۋىنشا، ق.توقايەۆقا 6 ملن 456 مىڭ 392 سايلاۋشى نەمەسە ولاردىڭ 81،31%-ى داۋىس بەرگەن. «بارىنە قارسىمىن» باعانىن 460 484 نەمەسە 5،8% سايلاۋشى تاڭداعان.
سونىمەن بىرگە، جيگۋلي دايرابايەۆقا 271 641 نەمەسە 3،42 پايىز، قاراقات ابدەنگە 206 مىڭ نەمەسە 2،6 پايىز، مەيرام قاجىكەنگە 200 907 نەمەسە 2،53 پايىز، نۇرلان اۋەسبايەۆقا 176 116 نەمەسە 2،22 پايىز جانە سالتانات تۇرسىنبەكوۆاعا 168 731 نەمەسە 2،12 پايىز داۋىس بەرىلگەن.
ازىرگە اۋماقتىق سايلاۋ كوميسسيالارى داۋىس بەرۋ ناتيجەلەرى تۋرالى حاتتامالاردىڭ ەلەكتروندى كوشىرمەلەرىن ۇسىندى.
«سونىمەن، ناقتىلانعان سايلاۋشىلار تىزىمدەرىنە ساي، جالپى سايلاۋشىلار سانى 11 ملن 953 مىڭ 465 ادامدى قۇرادى. ونىڭ 8 ملن 300 مىڭ 46 ادامى نەمەسە 69،44 پايىزى داۋىس بەرۋگە ارنالعان بيۋللەتەندەردى الدى. داۋىس بەرۋ كۇنى ق ر پرەزيدەنتتىگىنە كانديداتتاردىڭ 11 مىڭنان اسا سەنىم بىلدىرگەن ادامدارى، شەتەلدىك حالىقارالىق ۇيىمداردىڭ 641 بايقاۋشىسى، ساياسي پارتيالاردىڭ 15،5 مىڭنان اسا بايقاۋشىسى، قوعامدىق بىرلەستىكتەردەن 30 مىڭنان اسا بايقاۋشى سايلاۋدى باقىلاۋدى جۇرگىزدى. سايلاۋ ۋچاسكەلەرىندە 1225 قازاقستاندىق ب ا ق وكىلدەرى، 23 ەلدىڭ 41 شەتەلدىك باق-تىڭ اككرەديتتەلگەن جۋرناليستەرى اقپارات تاراتتى»، - دەدى نۇرلان ءابدىروۆ ورتالىق سايلاۋ كوميسسياسىندا وتكەن بريفينگىدە.
ايتا كەتەيىك، كەشە 20 قاراشادا ەلىمىزدە كەزەكتەن تىس پرەزيدەنت سايلاۋى ءوتتى. بارلىق وڭىردە 10 033 ۋچاسكە جۇمىس ىستەدى. ال شەت مەملەكەتتەردەگى قازاقستان وكىلدىكتەرى جانىنداعى 68 ۋچاسكە قۇرىلعان.
ەلىمىزدەگى بۇكىل سايلاۋشىلاردىڭ 69 پايىزى نەمەسە 8 ملن 282 مىڭنان استام ادام ءوز تاڭداۋىن جاساعان.
سونىمەن بىرگە، تۇندە ەxit poll ادىستەمەسى بويىنشا جۇرگىزىلگەن ساۋالنامالاردىڭ العاشقى قورىتىندىلارى ءمالىم بولدى.