تىركەۋ تالاپتارىنا ساي كەلمەيتىن كانديداتتاردىڭ اراسىندا زاڭ بۇزعاندار دا بولدى.
ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ الداعى ءماجىلىس سايلاۋىنا ۇسىنىلعان نەشە ادامنىڭ تىركەۋدەن وتپەي قالعانى تۋرالى مالىمەت بەردى، دەپ حابارلايدى اlmaty-akshamy.kz
«اۋماقتىق سايلاۋ كوميسسيالارى ۇسىنعان مالىمەتتەر نەگىزىندە كانديداتتى ۇسىنعاننان كەيىن تىركەۋ كەزەڭى اياقتالعانعا دەيىن 45 كانديدات كانديداتۋراسىن ءوز قالاۋىمەن الىپ تاستاۋ تۋرالى ءوتىنىش جازعان. كوميسسيالار ولاردى بەرىلگەن ءوتىنىش نەگىزىندە تىركەۋگە المادى. 125 كانديداتتتىڭ تىركەۋ تۋرالى ءوتىنىشى كەرى قايتارىلدى. ونىڭ ىشىندە ءبىر كانديدات ق ر كونستيتۋسياسى مەن «سايلاۋ تۋرالى» كونستيتۋسيالىق زاڭىنىڭ قازاقستان رەسپۋبليكاسىنىڭ اۋماعىندا كەيىنگى 10 جىل كولەمىندە تۇرۋ قاجەتتىگى جونىندەگى تالاپقا سايكەس كەلمەگەنى ءۇشىن تىركەۋدەن وتپەدى»، - دەدى وسك ءتوراعاسىنىڭ ورىنباسارى.
ونىڭ ايتۋىنشا، بىرنەشە كانديدات باس پروكۋراتۋرانىڭ مالىمەتى نەگىزىندە تىركەۋگە الىنباعان.
«باس پروكۋراتۋرانىڭ مالىمەتى نەگىزىندە، 4 كانديدات بويىنشا ەسەپتەن شىعارىلماعان جانە وتەلمەگەن سوتتىلىقتىڭ بولۋىنا بايلانىستى، 5 كانديدات بويىنشا سوت سىبايلاس جەمقورلىق جاساعانى ءۇشىن نەمەسە سىبايلاس جەمقورلىق بويىنشا زاڭ بۇزعانى ءۇشىن كىنالى دەپ تانىعاندىقتان باس تارتىلدى. باس پروكۋراتۋرانىڭ مالىمەتى بويىنشا، وسىنداي توعىز كانديدات بار بولىپ شىقتى»، - دەدى ول.
وسك وكىلىنىڭ سوزىنە قاراعاندا، تىركەۋدەن باس تارتىلعان كانديداتتاردىڭ باسىم كوپشىلىگى قۇجاتتاردىڭ تولىق پاكەتىن ۇسىنباعان.
«جەكەلەپ ايتساق، كانديداتتاردىڭ كەيبىرى سايلاۋ جارناسىن ۇسىنبادى. وسىنى نەگىزگە الىپ، كەشە ولاردى تىركەۋدەن باس تارتىلدى. ءبىر كانديداتتىڭ ءوتىنىشى سايلاۋ ناسيحاتىن زاڭمەن بەلگىلەنگەن مەرزىمنەن تىس ۋاقىتتا جۇرگىزگەنى ءۇشىن كەرى قايتارىلدى. تىركەلىپ قويعاننان كەيىن 4 كانديداتتىڭ تىركەۋ قۇجاتىنىڭ كۇشى جويىلدى. ونىڭ بىرەۋى ءوز قالاۋىمەن، ۇشەۋى تاپسىرعان دەكلاراسياسىنداعى مالىمەتتەردىڭ جالعان بولۋىنا بايلانىستى»، - دەدى كونستانتين پەتروۆ.