قارجى مينيسترلىگى "ءوسىمپۇلدار مەن ايىپپۇلدار سوماسىن ەسەپتەن شىعارۋ قاعيدالارىن بەكىتۋ تۋرالى" بۇيرىق جوباسىن دايىندادى، دەپ حابارلايدى aqshamnews.kz
قۇجاتتى ازىرلەۋدىڭ ماقساتى – 2026 جىلعى 1 قاڭتار مەن 31 ناۋرىز ارالىعىندا نەگىزگى بەرەشەك تولىق وتەلگەن جاعدايدا ءوسىمپۇلدار مەن ايىپپۇلداردى ەسەپتەن شىعارۋ ءتارتىبى مەن شارتتارىن ايقىنداۋ.
قارجى مينيسترلىگىنىڭ مالىمەتىنشە، بۇل شارا بيزنەسكە "تازا پاراقتان" باستاۋعا مۇمكىندىك بەرەدى. ياعني كاسىپكەرلەر ءوسىمپۇلدار مەن ايىپپۇلداردان بوساپ، بانكتىك شوتتاردى بۇعاتتان شىعارىپ، مۇلىككە قويىلعان شەكتەۋلەردى الىپ تاستاپ، زاڭدى قىزمەتىن كەدەرگىسىز جالعاستىرا الادى.
ۆەدومستۆونىڭ بولجامىنشا، اتالعان قاعيدالاردى قابىلداۋ كاسىپكەرلەردى نەگىزگى قارىزىن تولەۋگە ىنتالاندىرىپ، سالىقتىق جۇكتەمەدەن تولىق بوساۋىنا جول اشادى.
اتالعان قۇجات 27 قاڭتارعا دەيىن كوپشىلىك تالقىلاۋى ءۇشىن "اشىق نقا" پورتالىندا جاريالانعان.