ءوشىپ قالعان تۇتاس سىزىقتى كەسىپ وتسە، ايىپپۇل سالىنا ما؟

توزىپ، انىق كورىنبەيتىن جول بەلگىسىن باسىپ ءوتىپ كەتكەن جۇرگىزۋشى ايىپپۇل تولەمەسە بولا ما؟ تولىعىراق Tengri Auto ماتەريالىندا، - دەپ حابارلايدى aqshamnews.kz ءتىلشىسى. 

تۇتاس جول سىزىعىن كەسىپ ءوتۋ 

الماتى قالاسى پوليسيا دەپارتامەنتىنىڭ مالىمەتىنشە، اكىمشىلىك قۇقىقبۇزۋشىلىق تۋرالى كودەكستىڭ 596-بابى 3-بولىمىنە سايكەس، ەگەر جۇرگىزۋشى قوس نەمەسە جالعىز تۇتاس سىزىقتان بۇرىلىپ، قارسى باعىتتاعى جولاققا شىقسا، التى اي مەرزىمگە جۇرگىزۋشى كۋالىگىنەن ايىرىلادى. 

ەگەر جولداعى سىزىق ءوشىپ قالعان بولسا، جازادان قۇتىلۋعا بولا ما؟

ءيا، بولادى. اكىمشىلىك قۇقىقبۇزۋشىلىق تۋرالى كودەكستىڭ 741-بابى 2-بولىمىنە سايكەس، ەگەر جول بەلگىلەرى:

• ءوشىپ قالسا؛

• دۇرىس كورىنبەسە؛

• نەمەسە مەمست تالاپتارىنا ساي كەلمەسە،

وندا اكىمشىلىك ءىس توقتاتىلۋعا ءتيىس، ويتكەنى قۇقىقبۇزۋشىلىق قۇرامى انىقتالمايدى.

سىزىقتىڭ انىق بولماعانىن قالاي دالەلدەۋگە بولادى؟

• فوتو جانە ۆيدەو ءتۇسىرىڭىز.

• ۋاقىتى مەن ورنى كورىنەتىن قوسىمشالار ارقىلى دالەلدەر جيناڭىز.

• e-Otinish پورتالى ارقىلى شاعىم ءتۇسىرىڭىز – دالەلدەردى تىركەپ، اكىمشىلىك ءىستى توقتاتۋدى تالاپ ەتىڭىز.

ايىپپۇل سالىنسا، نە ىستەۋ كەرەك؟

سىزگە ءوشىپ قالعان جول سىزىعىن كەسىپ وتكەنى ءۇشىن ايىپپۇل سالىنسا نەمەسە جۇرگىزۋشى كۋالىگىڭىزدەن ايىرسا، بۇل شەشىمدى 10 كۇن ىشىندە سوتقا نەمەسە ۋاكىلەتتى ورگانعا شاعىمدانۋ ارقىلى قايتا قاراۋعا بولادى.