سايىس 10 سالماق دارەجەسىندە ءوتتى
قازاقستاننىڭ VI سپارتاكياداسىنا كۇرەس تۇرلەرى بويىنشا قاتىسقان قورعانىس مينيسترلىگى ورتالىق سپورت كلۋبىنىڭ بالۋاندارى ءتورت التىن، ءبىر كۇمىس جانە ءۇش قولا مەدال جەڭىپ الدى، دەپ حابارلايدى Almaty-akshamy.kz.
جارىسقا رەسپۋبليكالىق ماڭىزى بار قالالار مەن وبلىستاردىڭ قۇراما كوماندالارى قاتىستى. سپارتاكيادا حالىقارالىق كۇرەس فەدەراسياسىنىڭ ەرەجەلەرى بويىنشا ءار ستيلدە 10 سالماق دارەجەسىندە وتكىزىلدى.
"مۇنداي جارىستار وليمپيادالىق ويىنداردىڭ بەدەلىن تانىمال ەتۋگە، وڭىرلەردە سپورتتى دامىتۋعا ىقپال ەتەدى. سپارتاكيادا قورىتىندىسى بويىنشا رەيتينگتىك تۋرنيرلەرگە قاتىسۋ ءۇشىن گرەك-ريم، ەركىن جانە ايەلدەر كۇرەسى بويىنشا ۇلتتىق قۇراما كوماندالار جاساقتالادى"، - دەدى سپورت كوميتەتى ءتوراعاسىنىڭ ورىنباسارى – قورعانىس مينيسترلىگىنىڭ شتاتتىق كوماندالاردى دايارلاۋ ورتالىعىنىڭ باستىعى، پودپولكوۆنيك ءانۋار ۇسەنوۆ.