ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ رەفەرەندۋم ۋچاسكەلىك كوميسسيالارى داۋىس بەرۋ كۇنى، ۋاقىتى، ورنى جانە ءتارتىبى تۋرالى ازاماتتارعا داۋىس بەرۋ كۇنىنەن كەمىندە 10 كۇن بۇرىن، ياعني وسى جىلدىڭ 26 قىركۇيەگىنە دەيىن حابارلاۋ كەرەك ەكەنىن اتاپ ءوتتى.
وسى ناۋقان بارىسىندا كوميسسيالار داۋىس بەرۋ قۇقىعى بار ازاماتتاردى رەفەرەندۋمعا جەكە شاقىرۋعا ەرەكشە كوڭىل ءبولدى. شاقىرۋلاردىڭ ءبىرىڭعاي فورماسىن ورتالىق رەفەرەندۋم كوميسسياسى اۋماقتىق كوميسسيالارمەن بىرلەسە وتىرىپ ازىرلەدى.
كەيىن اۋماقتىق كوميسسيا ءتوراعالارى داۋىس بەرۋ كۇنىنە دايىندىق، ازاماتتاردى اقپاراتتاندىرۋ جانە كەيبىر ۋچاسكەلەردە داۋىس بەرۋ ۋاقىتىنىڭ وزگەرۋى تۋرالى قابىلدانعان شارالار جايىندا باياندادى.
ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ رەفەرەندۋمعا دايىندىق بارىسىن حالىققا كەڭىنەن جەتكىزۋدىڭ ماڭىزدىلىعىن اتاپ ءوتتى.
رەفەرەندۋمعا دايىندىق پەن ونى وتكىزۋ تۋرالى تولىق ءارى ناقتى اقپارات الۋ ءۇشىن ورتالىق رەفەرەندۋم كوميسسياسى اقپاراتتىق ماتەريالدار (بەينە، اۋديوروليكتەر، پلاكاتتار جانە ادىستەمەلىك قۇرالدار) ازىرلەدى. سونىمەن قاتار، ازاماتتاردى قوسىمشا حاباردار ەتۋ ءۇشىن SMS-حابارلامالار جانە ءموبيلدى بانكتەردە PUSH-حابارلامالار جىبەرۋ جوسپارلانعان. بۇل جۇمىس داۋىس بەرۋ كۇنىنە دەيىن جالعاسادى.
نۇرلان ءابدىروۆ سونداي-اق رەسپۋبليكالىق رەفەرەندۋمعا قاتىستى قوعامدىق پىكىرگە ساۋالناما جۇرگىزۋدىڭ زاڭنامالىق تالاپتارىن دا اتاپ ءوتتى. سايلاۋ جانە رەفەرەندۋم تۋرالى زاڭدارعا سايكەس، داۋىس بەرۋ كۇنىنە دەيىنگى بەس كۇن ىشىندە جانە داۋىس بەرۋ كۇنىندە رەفەرەندۋم ناتيجەلەرى تۋرالى قوعامدىق پىكىردى، بولجامداردى نەمەسە باسقا زەرتتەۋلەردى بۇقارالىق اقپارات قۇرالدارىندا نەمەسە ينتەرنەت پلاتفورمالاردا جاريالاۋعا تىيىم سالىناتىنىن ەسكە سالدى.