كىشى جامباس كوكتامىرىنىڭ ءتۇيىلىپ كەڭەيۋى ادەتتە بالا تابۋعا قابىلەتتى جاستاعى ايەلدەردىڭ اراسىندا كەڭىنەن تارالادى.
ورتالىق قالالىق كلينيكالىق اۋرۋحانادا كىشى جامباس كوكتامىرىنا ەمبوليزاسيا جۇرگىزۋ بويىنشا يننوۆاسيالىق ماستەر-كلاسس ءوتتى، دەپ حابارلايدى Almaty-akshamy.kz
العاش رەت وقكا رەنتگەن حيرۋرگى سۇلتان يلييەۆ ەندوۆاسكۋليارلى حيرۋرگ قاستەر بايجانۇلىمەن بىرلەسە وتىرىپ كوپتەگەن ۋاقىت بويى كىشى جامباس كوكتامىرىنىڭ ءتۇيىلىپ كەڭەيۋىمەن اۋىرعان 30 جاستاعى قىزعا كىشى جامباس ەمبوليزاسياسىن جاسادى.
بۇل - قاننىڭ جىنىس مۇشەلەرى ارقىلى اعاتىن تامىرلارىنىڭ كەڭەيۋى. سونداي-اق كوكتامىر اۋرۋى ديامەتر شەگىندە ون ميلليمەترگە دەيىن كەڭەيەدى دە، جۇيكە تالشىقتارىنىڭ قىسىلىپ اۋرۋىنا اكەلەدى.
بۇل دەگەنىمىز - تىرشىلىك ەتۋ ساپاسىنىڭ تومەندەۋى، پسيحوەموسيونالدى كۇيزەلىسكە ءتۇسۋى، وتباسىلىق تۇسىنىسپەۋشىلىك پەن ناۋقاستاردىڭ الەۋمەتتىك بەيىمسىزدەنۋى. وكىنىشكە وراي، جامباس (كىشى) كوكتامىرلارىنىڭ كەڭەيۋىنە بايلانىستى كىشى جامباس كوكتامىرىنىڭ ءتۇيىلىپ كەڭەيۋىنىڭ 15-20% كوبىنەسە ايەلدەر اراسىندا كەزدەسەدى. كىشى جامباس كوكتامىرىنىڭ ەمبوليزاسياسى - بۇل سوزىلمالى جامباس اۋرۋىنا اپاراتىن، جامباس پەن انالىق بەزدىڭ كوكتامىرىن جەلىمدەۋگە باعىتتالعان ەم ءتۇرى.
«كىشى جامباس كوكتامىرىنىڭ ءتۇيىلىپ كەڭەيۋىنىڭ تارالۋى جاس ەرەكشەلىگىنە قاراي ۇلعايۋدا. جامباس كوكتامىرىنىڭ پاتولوگياسى كوبىنەسە 25-45 جاس توبىنداعى ناۋقاستاردا رەپرودۋكتيۆتى كەزەڭدە انىقتالادى. كىشى جامباس كوكتامىرلارىنىڭ ەمبوليزاسياسى- 20-30 مينۋت عانا ۋاقىت الاتىن ەم ءتۇرىن شۇعىل جۇرگىزۋدەگى زاماناۋي يننوۆاسيالىق ادىستەمەنىڭ ءبىرى. كىشى جامباس كوكتامىرىنا ەمبوليزاسيا جۇرگىزۋ ءۇشىن، جەرگىلىكتى انەستەزيا قولدانىلىپ، ناۋقاس بىرەر ساعاتتان سوڭ ءوز بەتىمەن جىلجىپ قوزعالا باستادى»، - دەدى سۇلتان يلييەۆ.
ماماننىڭ ايتۋىنشا، اتالمىش ادىستەمەنى قولدانۋدان كەيىن وڭالتۋ كەزەڭىندە از عانا ۋاقىت اۋىرسىنۋ بولادى. ءتىپتى 1-2 ايدان سوڭ ناۋقاس كوكتامىرىنىڭ ءتۇيىلىپ كەڭەيۋى اۋرۋىن ۇمىتىپ تا كەتەدى.
«ەمدىك ارالاسۋدان كەيىنگى بىرنەشە اپتادان سوڭ بالا تۋۋ قابىلەتى قالپىنا كەلىپ، كىشى جامباس جاعىنداعى اۋىرسىنۋ جوعالادى»، - دەپ تۇيىندەدى ءوز ءسوزىن.