مەشىتتىڭ جالپى اۋدانى 57 مىڭ شارشى مەتر بولادى.
ەلىمىزدىڭ استاناسىندا قازاقستان مەن ورتالىق ازياداعى ەڭ ۇلكەن جاڭا مەشىتتىڭ سالتاناتتى اشىلۋى ءوتتى، دەپ حابارلايدى Almaty-akshamy.kz.
كوك ءتۇستى باس كۇمبەزىنىڭ بيىكتىگى 83،2 مەترگە جۋىق، ديامەترى 62 مەتر بولادى.
ءتورت مۇنارانىڭ بيىكتىگى - 130 مەتر. ءار مۇنارا بەس بولىكتەن تۇرادى، ولار يسلامنىڭ بەس تىرەگى - يمان، ناماز، ورازا، زەكەت جانە قاجىلىقتى بەينەلەيدى. سول قاناتتاعى ءبىر مۇنارا كەلۋشىلەرگە اشىلادى. قوناقتار ليفتپەن كوتەرىلىپ، كورىنىستى تاماشالاي الادى.
مەشىتتىڭ كىرە بەرىس ەسىگى الەمدەگى ەڭ بيىك اعاش ەسىكتەردىڭ ءبىرى سانالادى. ول تروپيكالىق افريكادا وسەتىن يروكو قاتتى اعاشىنان قولمەن جاسالعان. ونىڭ بيىكتىگى 12،4 مەتر، سالماعى ءبىر جارىم توننا. ەسىكتەرى قازاقى ورنەكتەرمەن بەزەندىرىلگەن. ال سىرتقى قابىرعالارىندا كوگىلدىر فونعا اق اراب جازۋى جازىلعان.
مەشىتتىڭ قابىرعالارى مەن كۇمبەزىنىڭ ءىشى ءتۇرلى-تۇستى ويۋلار، ورنەكتەر، قۇران اياتتارى جانە دۇعالارمەن بەزەندىرىلگەن. ءبىراق نەگىزىنەن قازاق ورنەكتەرى سالىنعان.
اراب كالليگرافياسىن قازاق شەبەرى اسىلبەك بايزاق ۇلى جازعان.
مەشىتتىڭ ىشكى ەسىكتەرىنىڭ بيىكتىگى 12 مەتر، تەرەزەلەرى ءتۇرلى-تۇستى ويۋ-ورنەكتەرمەن بەزەندەرىلگەن اينەكتەن جاسالعان.
قۇبىلا جاقتاعى قابىرعادا اللانىڭ 99 ەسىمى قاشالعان. موزايكا قابىرعانىڭ ۇزىندىعى 100 مەتر، بيىكتىگى 22،4 مەتر. موزايكا ءتۇرلى ءتۇستى 25 ميلليون اينەكتەن قۇرالعان.
ۇلكەن زال مەن ايەلدەر ناماز وقيتىن جەر تولىعىمەن قازاقى ويۋ-ورنەكتەرمەن كومكەرىلگەن. كىلەمنىڭ جالپى اۋدانى 15 525 شارشى مەتر – بۇل الەمدەگى قولدان جاسالعان ەڭ ۇلكەن كىلەم. كىلەمنىڭ قالىڭدىعى 15 ميلليمەتر. ول جاڭا زەلانديادا 100 پايىز جۇننەن توقىلعان.
مەشىتتىڭ جالپى اۋدانى 57 مىڭ شارشى مەتر بولادى. عيماراتتىڭ اينالاسىندا ۇلكەن ساياباق بار. مەشىت ورنالاسقان جەر تەلىمىنىڭ اۋدانى - 10 گەكتار.