ال اقش تۇرعىندارى بۇدان 800 كالوريا كوبىرەك تۇتىنادى ەكەن.
Ourworldidata الەم حالىقتارىنىڭ ازىعىن سارالاپ، ارنايى رەيتينگ جاسادى، دەپ حابارلايدى Almaty-akshamy.kz Ranking.kz سايتىنا سىلتەمە جاساپ.
ەڭ جوعارى كالوريالى تاعامدى ەۋروپالىقتار سۇيسىنە جەيتىن بولىپ شىقتى: ورتاشا ەسەپپەن جان باسىنا شاققاندا تاۋلىگىنە - 3،4 مىڭ ككال. ودان كەيىن امەريكا (ادام باسىنا ورتاشا ەسەپپەن تاۋلىگىنە 3،3 مىڭ ككال) جانە وكەانيا (3،1 مىڭ ككال) كەلەدى.
ازيا ەلدەرىندەگى تاعامنىڭ كالوريالىعى الەمدىك ورتاشا كورسەتكىشكە سايكەس كەلەدى. ال افريكا ەلدەرى الەمدىك كورسەتكىشتەردەن الدەقايدا ارتتا قالعان. افريكالىقتار جان باسىنا شاققاندا ورتاشا ەسەپپەن تاۋلىگىنە نەبارى 2،6 مىڭ كالوريا تۇتىنادى ەكەن.
عالىمدار 2020 جىلى ادامعا قاجەتتى ەنەرگيا الۋ ءۇشىن تاۋلىگىنە 1،8 مىڭ ككال جەتكىلىكتى دەپ بەلگىلەگەن بولاتىن. الەمدەگى تۇتىنىلاتىن كالوريالاردىڭ ورتاشا سانى قاجەتتى مينيمۋمنان ايتارلىقتاي جوعارى.
2019 جىلى الەم حالقىن اقۋىزدارمەن قامتاماسىز ەتۋ تاۋلىگىنە جان باسىنا شاققاندا 81،97 گراممدى قۇرادى. 2010 جىلى بۇل كورسەتكىش 78،24 گرامم، 2000 جىلى 73،45 گرامم بولعان.
ەڭ جوعارى كورسەتكىش تاعى دا ەۋروپادا (تاعامداعى اقۋىزدىڭ 103،68 گرامم)، ەڭ تومەنگىسى افريكادا (65،15 گرامم) بولدى. امەريكادا بۇل كورسەتكىش – 96،14 گرامم، وكەانيادا – 95،13 گرامم، ازيادا – 81،89 گرامم بولدى.
"تاۋلىكتىك نورما الەمدىك ورتاشا دەڭگەيدەن ءسال جوعارى بولدى: 82،52 گرامم. جالپى العاندا، اقۋىزدى تۇتىنۋدىڭ تاۋلىكتىك كورسەتكىشى جىلدان جىلعا ارتىپ كەلەدى. ماسەلەن، 2010 جىلى بۇل كورسەتكىش 78،56 گرامم بولسا، 2000 جىلى 73،51 گرامم بولدى" - دەلىنگەن زەرتتەۋدە.
بۇعان قوسا 2019 جىلى كۇنىنە ورتاشا ماي قابىلداۋ 86،76 گراممعا جەتكەن. 2015 جىلى – 82،6 گرامم، 2010 جىلى – 79،69 گرامم، 2005 جىلى – 75،15 گرامم، 2000 جىلى – 71،99 گرامم بولىپتى.
ەڭ جوعارى كورسەتكىش ەۋروپادا (تاۋلىكتىك راسيوندا 132،97 گرامم ماي)، ەڭ تومەنى افريكادا (53،91 گرامم) بولدى. ماكرووڭىرلەردىڭ كورسەتكىشتەرىنىڭ ايىرماشىلىعى بىردەن 2،5 ەسەنى قۇرادى. امەريكادا بۇل كورسەتكىش 130،55 گراممعا، وكەانيادا 128،61 گراممعا، ازيادا نەبارى 80،47 گراممعا جەتكەن.
ادامعا تاۋلىگىنە 87،34 گرامم ماي تۇتىنۋعا بولادى.
دەسە دە الەم حالقىنىڭ شامامەن 9،9%-ى اش (2019 جىلعى دەرەكتەر)، جەگەن تاماقتارى تاۋلىكتىك نورماعا جەتپەيدى.
ساراپشىلار تولىققاندى تاماقتانباۋ كورسەتكىشى جىلدان جىلعا تومەندەپ كەلەتىنىن ايتادى، ماسەلەن 20 جىل بۇرىن بۇل سان 13% قۇراعان.
اسىرەسە بۇل پروبلەما افريكا حالىقتارىن جۇدەتكەن. قۇرلىقتاعى حالىقتىڭ 21% تويىپ تاماق ىشپەك تۇگىل، تاۋلىكتىك نورمانى جەگەن ەمەس، اشىعىپ وتىر. ودان كەيىن ازيا حالىقتارى (9%)، وكەانيا (6،2%) جانە امەريكا (5،8%) ەلدەرى تۇر. ەۋروپادا بۇل كورسەتكىش نەبارى 1،3%-دى قۇرادى.
ساراپشىلار سوڭعى ونجىلدىقتاردا ازيا مەن افريكادا كالوريالاردى تۇتىنۋدىڭ ايتارلىقتاي وسكەنىن، سونىڭ سالدارىنان تاماقتانباۋ دەڭگەيىنىڭ تومەندەگەنىن اتاپ وتەدى.