اباي وبلىسىنداعى پولوۆينكا، تاليسا جانە بۇلاق اۋىلدارىنان كەتۋگە ءماجبۇر بولعان تۇرعىنداردىڭ بالالارىنا جازعى لاگەر ۇيىمداستىرىلادى.
بۇل تۋرالى وبلىس اكىمدىگىنىڭ باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz.
ەۆاكۋاسيالانعان بالالاردىڭ بوس ۋاقىتىن جۇيەلى ۇيىمداستىرۋ ءۇشىن كۇن سايىن اباي مۋزەيىنە، قالانىڭ باسقا دا مۇراجايلارىنا، بيولوگيالىق ورتالىققا، كينوعا، ورتالىق ساياباققا ەكسكۋرسيالار ۇيىمداستىرىلادى.
«بالالار ءۇشىن دەمالىس جانە ويىن-ساۋىق باعدارلامالارى ازىرلەنىپ جاتىر. سونداي-اق بالالارعا ارنالعان №49 ورتا مەكتەپ بازاسىندا مەكتەپ لاگەرى جۇمىس ىستەيدى. وندا ءبىلىم بەرۋ ساباقتارىمەن قاتار پسيحولوگيالىق قولداۋ كورسەتىلەدى»، دەدى ەۆاكۋاسيالىق پۋنكتتىڭ وكىلى ءبىرجان بۇلابايەۆ.
ايتا كەتسەك، سەمەيدەگى ەۆاكۋاسيالىق پۋنكتتەردە 189 ادام، ونىڭ ىشىندە 74 بالا بار. جالپى، قالادا 800 ادامعا ارنالعان 9 ەۆاكۋاسيالىق پۋنكت اشىلعان.