وسى جىلدىڭ قاڭتار-اقپانىندا ەلىمىزدە ءورت قاۋىپسىزدىگى سالاسىندا 47 قىلمىستىق قۇقىقبۇزۋشىلىق تىركەلدى. بۇل 2022 جىلدىڭ ەكى ايىنداعى كورسەتكىشتەن 17،5 پايىزعا كوپ، دەپ حابارلايدى اlmaty-akshamy.kz قازاقپارات-قا سىلتەمە جاساپ.
Finprom.kz پورتالىنىڭ مالىمەتىنشە، 2022 جىلدىڭ 12 ايىندا رەسپۋبليكا اۋماعىندا مۇنداي 54 قۇقىقبۇزۋشىلىق تىركەلىپ، جىل ىشىندە 23،9 پايىزعا كەمىگەن.
ال بيىل سەكتورداعى قىلمىستاردىڭ باسىم بولىگى سولتۇستىك قازاقستان وبلىسىنا تيەسىلى - 6 جاعداي.
سونىمەن قاتار بۇل كورسەتكىش اقتوبە وبلىسى مەن استانا قالاسىندا دا (5 جاعدايدان) جوعارى.
ودان كەيىنگى ورىنداردا شىمكەنت قالاسى مەن جەتىسۋ وبلىسى (4 جاعدايدان) تۇر.
ەكى ايدىڭ ىشىندەگى بارلىق قۇقىق بۇزۋشىلىقتىڭ جارتىسى وسى 5 وڭىردە بولعان.
جالپى، قۇقىقبۇزۋشىلىقتار ەلىمىزدىڭ 20 ءوڭىرىنىڭ 17-سىندە تىركەلگەن. ال اباي، قوستاناي جانە ۇلىتاۋ وبلىستارىندا ءبىر دە ءبىر مۇنداي فاكتى تىركەلگەن جوق.
سەكتورداعى اكىمشىلىك قۇقىق بۇزۋشىلىقتارعا كەلەر بولساق، 2022 جىلدىڭ قاڭتار-جەلتوقسان ايلارىنىڭ قورىتىندىسىندا ءورت قاۋىپسىزدىگى ەرەجەسىن بۇزۋعا قاتىستى 24،4 مىڭ دەرەك تىركەلگەن.
بۇل ءبىر جىل بۇرىنعى كورسەتكىشتەن 26،2 پايىزعا كوپ. مۇنان بولەك، كولىكتەگى ءورت قاۋىپسىزدىگى ەرەجەسىن ساقتاماۋدىڭ 1،9 مىڭ وقيعاسى ورىن العان.
565 وقيعا اتموسفەرا اۋاسىن قورعاۋ جانە قالدىقتاردى قويمالاۋ نەمەسە جاعۋ كەزىندەگى ءورت قاۋىپسىزدىگى جونىندەگى تالاپتاردى ورىنداماۋعا قاتىستى.
سونىمەن قاتار 525 وقيعا ورمانداردا ءورت قاۋىپسىزدىگى تالاپتارى مەن سانيتارلىق ەرەجەلەردى بۇزۋعا بايلانىستى تىركەلگەن.