ءورت جيىلەيتىن ماۋسىمنىڭ الدىندا الماتى ساقتىقتى كۇشەيتتى

ىلە الاتاۋى مەملەكەتتىك ۇلتتىق پاركىندە ءورت جيىلەيتىن ماۋسىمعا دايىندىق جۇمىستارى باستالدى. ىلە الاتاۋى ۇلتتىق پاركىنىڭ مەدەۋ فيليالىنا قاراستى ورمان ورتىنەن قورعاۋ ستانسياسىنىڭ باستىعى داۋلەت جەتپىسبايەۆ وڭىرلىك كوممۋنيكاسيالىق قىزمەتىندە وتكەن پرەسس-كونفەرەنسيادا وسىلاي دەدى، دەپ حابارلايدى aqshamnews.kz

«2005 جىلعى 4 اقپان كۇنگى №026-ن/ك قاۋلىنىڭ اياسىندا ۇلتتىق پاركتەگى تەحنيكاعا تەكسەرۋ جۇرگىزىلىپ، ءورتتى سوندىرۋگە ارنالعان قۇرال-جابدىقتاردى جاڭارتىپ، ءار ستانسيادا 300 ليتر بەنزين مەن 200 ليتر ديزەل وتىنىنان ۇلكەن قور جاساپ قويدىق»، - دەپ اتاپ ءوتتى جەتپىسبايەۆ.
  
پاركتەگى 4 بولىمشەنىڭ ءارقايسىسىندا ورمان ءورتىن سوندىرەتىن 4 توپ پەن 33 ادام جۇمىس ىستەيدى. «ينسپەكتورلاردىڭ 131 اتى، 100 كومپلەكت كيىمى بار.  بۇدان بولەك، پاركتە  4 ءورت سوندىرەتىن كولىك، 2 ارناۋلى ماشينا، 10 تراكتور مەن 2 سۋ جەتكىزەتىن قۇرىلعى تاعى بار»،- دەپ اتاپ ءوتتى ول.  

سونداي-اق، ينسپەكتورلاردى وقىتۋعا دايىندىق اياقتالىپ، الماتى اۋماقتىق ينسپەكسياسىنىڭ وكىمى بويىنشا كەيىننەن تەستىلەۋ ارقىلى 36 ساعاتتىق وقىتۋ ۇيىمداستىرىلدى.  

ونىڭ ايتۋىنشا، وسى دايارلىق جۇمىستارىنىڭ اياسىندا 22 باقىلاۋ مۇناراسى مەن تىكۇشاققا ارنالعان الاڭدى جوندەۋدەن وتكىزىپ،  228،5 شاقىرىم بولاتىن ءورت كەزىندە قاتىنايتىن جول قالپىنا كەلتىرىلمەك.  

«تەحنيكالىق جاعىنان ۇلتتىق پارك قانداي جاعدايعا بولسىن دايىن. ءبىز، سونىمەن بىرگە، ءورتتى بولىرماس ءۇشىن 40 مىڭ پاراق ۇلەستىرىپ، وسى اۋماقتا ورنالاسقان جەردىڭ يەلەرىنە ارناپ 85 ەسكەرتپە تاراتىپ شىقتىق»، - دەپ تۇيىندەدى جەتپىسبايەۆ.