الماتىنىڭ اۋەزوۆ اۋدانىنا قاراستى «مامىر» ىقشاماۋدانىندا تۇراتىن شىنار جاقىپاقىن قازاقتىڭ ۇلتتىق تاعامدارىنىڭ ءبىرى – ورمەتوستىكتى دايىنداۋدىڭ حاس شەبەرى.
ءومىرىن ۇستازدىقپەن بايلانىستىرعان ول بۇگىندە قالاداعى №188 مەكتەپ-گيمنازيادا گەوگرافيا ءپانىنىڭ ءمۇعالىمى بولىپ قىزمەت اتقارادى. جاقىندا شىنار مۇعالىمدەر اراسىندا وتكەن «ۇلى دالا تۇلعالارى. ۇلى دالا ەسىمدەرى» اتتى قالالىق بايقاۋدا ءىى ورىندى جەڭىپ الدى. جوبالىق جۇمىسىن «ونەگە ەتەم قىزىما وزگەشە استىڭ ءتۇر-تۇرىن» دەپ اتاپتى. ناۋرىز مەرەكەسى قارساڭىندا ءبىز شىنار نۇرداۋلەتقىزىن ماراپاتىمەن قۇتتىقتاپ، جەڭىمپاز اتانۋىنا سەبەپكەر بولعان ۇلتتىق تاعامدى كىمنەن ۇيرەنگەنىن جانە ونىڭ دايىندالۋ ءادىسىن سۇرادىق.
– بۇل تاعامدى ازىرلەۋدى ماعان انام ۇيرەتتى. ال انام اجەمنەن ۇيرەنگەن. ورمەتوستىك ورگەندە ساۋساقتارىنا كوز ىلەسپەيتىن. قىزىعاتىنمىن. دايىنداۋ ءتاسىلىن بالا كەزىمنەن كورىپ وسكەندىكتەن بولار، كەيىننەن انامنىڭ ايتۋىمەن ورمەتوستىك ورۋگە تەز ماشىقتانىپ الدىم. ونى بۇگىندە قىزىم اجارعا ۇيرەتىپ ءجۇرمىن. وسى ءساتتى پايدالانىپ، مەن بارلىق ىسىمە قولداۋ كورسەتىپ، ۇنەمى تىلەكشى بولىپ وتىراتىن انام سىپايى جولسەيىتقىزىنا العىس بىلدىرگىم كەلەدى. انام – مەنىڭ تىرشىلىگىمنىڭ گ ۇلى، تاعدىرىمنىڭ تامىرى، – دەيدى ول. شىناردىڭ اناسىنان ۇيرەنگەن تاعامى بۇل عانا ەمەس. ول قويدىڭ ۇلتابارىنان دا ەرەكشە اس – «ۇيرەك» جاساۋدى دا جاقسى مەڭگەرگەن. ۇلتتىق تاعامدارعا قاتىستى ايتارى كوپ ۇستاز اڭگىمەسىن ءارى قاراي بىلاي دەپ جالعاستىردى:
«بىزدە قازاقتىڭ تاعامدارى وتە مايلى، دەنساۋلىققا زيان دەگەن ءبىر تۇسىنىك بار. مەنىڭ ويىمشا، بۇل دۇرىس پىكىر ەمەس. ماسەلەن، ورمەتوستىكتى ۇيگە كۇيەۋ بالا كەلگەندە قۇرمەت بەلگىسى رەتىندە الدىنا قويعان. ول – قويدىڭ ءتوس ەتىنەن جاسالىپ، سىرتى اش ىشەكپەن ورىلەتىن قازاقتىڭ ۇلتتىق تاعامى. وكىنىشتىسى، ءقازىر كوپ ادامدار قوي سويعاندا ونىڭ ىشەك-قارنىن تاستاي سالۋعا دايىن تۇرادى. ال ىشەك-قارىندا ادام اعزاسىنا پايدالى زاتتار كوپ. وندا جاستىقتى ساقتايتىن كوللاگەن مەن ەلاستان سەكىلدى دارۋمەندەر بار. مەنىڭ ارمانىم – قازاقتىڭ ۇلتتىق تاعامدارىن شەتەلدەردەن قوناقتار ارنايى ىزدەپ كەلەتىندەي دەڭگەيگە جەتكىزۋ. سوندىقتان ۇلتتىق تاعامداردى ناۋرىزدا عانا داستارقانىمىزعا قويماي، كۇندەلىكتى ىشىپجەۋدى ادەتكە اينالدىرساق، قۇبا-قۇپ»، – دەدى ول ءسوز سوڭىندا.
ءبىز قازاقتىڭ ۇمىت بولا باستاعان ەرەكشە تاعامدارىنىڭ ءبىرىن ازىرلەۋدى ناسيحاتتاپ جۇرگەن شىنار نۇرداۋلەتقىزىنا الداعى ىسىنە ساتتىلىك تىلەدىك.