تابيعاتقا 65،7 ملن تەڭگە مولشەرىندە زالال كەلتىرىلگەن
شىعىس قازاقستان وبلىسىندا تابيعاتقا 65،7 ملن تەڭگە زالال كەلتىرگەن ورمانشىلار مەن كاسىپكەرلەر سوتتالدى، دەپ حابارلايدى Almaty-akshamy.kz.
وسكەمەن قالاسىنىڭ № 2 سوتى باسپا ءسوز قىزمەتىنىڭ مالىمەتىنە سۇيەنسەك، «وسكەمەن ورمان شارۋاشىلىعى» كاسىپورنىنىڭ لاۋازىمدى تۇلعالارىنا قىزمەتتىك وكىلەتتىگىن اسىرا پايدالاندى دەگەن ايىپپەن قىلمىستىق ءىس قارالعان. سونداي-اق ولاردىڭ ءبىرى بوپسالاۋ ارقىلى بىرنەشە رەت پارا العانى ءۇشىن ايىپتى بولدى.
بۇدان بولەك، ا. جانە ش. ەسىمدى كاسىپكەرلەرگە قاتىستى اعاشتاردى زاڭسىز كەسىپ، ءىرى كولەمدە زيان كەلتىرۋ فاكتىسى بويىنشا سوت ءىسى قارالدى. بەلگىلى بولعانداي، ولاردىڭ زاڭسىز ارەكەتتەرىنىڭ كەسىرىنەن تابيعاتقا 65،7 ملن تەڭگە مولشەرىندە زالال كەلتىرىلگەن. سوت بارىسىندا ايىپتالۋشىلار ءوز كىنالارىن تولىقتاي مويىندادى.
«وسكەمەن ورمان شارۋاشىلىعىنىڭ» ديرەكتورى اۋداندىق ورمان شارۋاشىلىعى مەكەمەلەرى باسشىلارىمەن ءسوز بايلاسىپ، 2020 جىلدىڭ مامىر ايىنان 2021 جىلدىڭ اقپانىنا دەيىنگى ارالىقتا ش. مەن ا.-عا زاڭسىز اعاش كەسۋگە مۇمكىندىك بەرگەن. سوت ورمان شارۋاشىلىعى مەكەمەلەرىنىڭ قىزمەتكەرلەرىنە ءتۇرلى جازا تاعايىندادى. سونىڭ ىشىندە «وسكەمەن ورمان شارۋاشىلىعىنىڭ» باسشىسى 3 جىلعا باس بوستاندىعىنان ايىرىلدى. «سوت ۇكىمى بويىنشا ورمانشىلار 1 جىل 6 ايدان – 3 جىلعا دەيىنگى مەرزىمگە باس بوستاندىقتارىنان ايىرىلدى. سونداي-اق ولارعا ءومىر بويىنا مەملەكەتتىك قىزمەتتە جۇمىس ىستەۋگە تىيىم سالىندى. ال كاسىپكەرلەر ش. جانە ا. 3 جىل مەرزىمگە اعاش كەسۋ سالاسىندا جەكە كاسىپكەرلىكپەن اينالىسۋ قۇقىعىنان ايىرىلىپ، 50 اەك مولشەرىندە ايىپپۇل تولەۋگە مىندەتتەلدى. ۇكىم زاڭدى كۇشىنە ەنگەن جوق»، - دەلىنگەن اقپاراتتا.