قالا كۇنى قارساڭىندا ەكى كەش بويى قاتارىنان رەسپۋبليكا سارايىنىڭ الدىنداعى الاڭدا جاندى مۋزىكا اۋەلەدى. اباي اتىنداعى قازاق ۇلتتىق وپەرا جانە بالەت تەاترىنىڭ جەتەكشى سوليستەرى اشىق اسپان استىندا ونەر كورسەتىپ، ولاردى وركەستر ۇجىمدارى سۇيەمەلدەدى. مىڭداعان ادامدار سۇيىكتى اندەرىن تىڭداۋعا كەلدى. اشىق اسپان استىنداعى كورەرمەندەر زالىندا ورىن تاپپاعاندار كونسەرتتى ورىندىقتاردا وتىرىپ تىڭدادى. ويتكەنى، كوپتەن بەرى وركەسترلەر فەستيۆالى الماتىلىقتاردىڭ اشىق اسپان استىنداعى سۇيىكتى مەرەكەلەرىنىڭ بىرىنە اينالدى.
فەستيۆال ون ەكىنشى جىل قاتارىنان وتكىزىلىپ كەلەدى جانە ءار ۋاقىتتا ۇيىمداستىرۋشىلار وعان ارنالعان تاقىرىپتى ويلاپ تابادى. الماتىلىقتار وركەسترلەردىڭ ورىنداۋىندا ايگىلى كينوكارتينالار مەن مۋلتفيلمدەردىڭ ساۋندترەكتەرىن تىڭداپ، ەڭ تانىمال كەڭەستىك اندەرمەن بىرگە نوستالگياعا بوي الدىردى.
بۇل جولى ەكى كۇن بويى الماتىلىقتار مەن قالا قوناقتارىنا قازاقستاندىق كومپوزيتورلاردىڭ مۋزىكاسىن تىڭداۋ ۇسىنىلدى. العاشقى كەشتە ساحنادان وپەرا سوليستەرىنىڭ ورىنداۋىنداعى قازاقستاندىق كومپوزيتورلاردىڭ شىعارمالارى شىرقالدى، ال ولاردى الەكساندر بەلياكوۆتىڭ جەتەكشىلىگىمەن ەسترادالىق-سيمفونيالىق وركەستر سۇيەمەلدەدى. ساحناعا ءبىرىنشى بولىپ اباي اتىنداعى وپەرا جانە بالەت تەاترىنىڭ ءسوليسى شىعىپ، «ارمان قالا» ءانىن ورىندادى. ۆەنەرا الپىسبايەۆا، نۇرجان باجەكەنوۆ، باۋىرجان مۋسين جانە ت.ب. كوپشىلىكتى ونەرلەرىنە ءتانتى ەتتى. ساحنادان قۇرمانعازى، ءشامشى قالداياقوۆ، زامانداسىمىز تولەگەن مۇحامەدجانوۆ جانە باسقا دا كوپتەگەن كومپوزيتورلاردىڭ شىعارمالارى شىرقالدى. الماتىلىقتار اندەردىڭ كوپشىلىگىن جاتقا بىلەتىن، سوندىقتان دا ورىنداۋشىلارمەن بىرگە ايتتى.
بەلگىلى سكريپكاشى ءجاميلا سەركەبايەۆا دا ونەر كورسەتتى. سونداي-اق، كونسەرتكە قازاقستاندىق ەسترادا جۇلدىزدارى، ونىڭ ىشىندە كورەرمەندەردىڭ سۇيىكتىسى ءمادي رىمبايەۆ قاتىستى.
ەكىنشى كەش ۇلى دالانىڭ فولكلورلىق ءىنجۋ-مارجاندارىنا ارنالدى. حالىق كومپوزيتورلارىنىڭ شىعارمالارىن قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى مەن "سازگەن سازى"فولكلورلىق-ەتنوگرافيالىق ءانسامبلى ورىندادى.