الەۋمەتتىك جەلىدە Oreo ءتاتتىسى ءقاۋىپتى ەكەنى تۋرالى اقپارات تاراپ جاتىر. وندا بۇل ءتاتتى "ارتەريانى بىتەپ تاستاۋى" مۇمكىن ەكەنى، ال كرەمى "پلاستيكالىق جەلىم" ەكەنى ايتىلادى، - دەپ حابارلايدى aqshamnews.kz
دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتى مالىمەتىنشە، بۇل اقپارات شىندىققا جاناسپايدى جانە عىلىمي تۇرعىدا دالەلدەنبەگەن.
"كونديتەرلىك ونىمدەر، سونىڭ ىشىندە پەچەنە ەۋرازيالىق ەكونوميكالىق وداققا مۇشە مەملەكەتتەر اۋماعىندا تەك كەدەن وداعىنىڭ تالاپتارىنا سايكەس كەلگەن جاعدايدا عانا اينالىمعا جىبەرىلەدى"، - دەپ جازىلعان حابارلامادا.
ۆەدومستۆو اقپاراتىنا سۇيەنسەك، 2025 جىلى Oreo پەچەنەسىنىڭ ۇلگىلەرى زەرتتەلگەن.
"زەرتتەۋ ناتيجەسىندە ميكروبيولوگيا جانە توكسيكولوگيا كورسەتكىشتەرى بويىنشا تەحنيكالىق رەگلامەنتتەر تالاپتارىنا سايكەس كەلمەيتىن جاعداي انىقتالعان جوق. زەرتتەلگەن بارلىق ۇلگىنىڭ تاڭبالانۋى بەلگىلەنگەن تالاپتارعا تولىق سايكەس كەلدى"، - دەپ جازىلعان حابارلامادا.
كوميتەت ازاماتتاردى قىراعىلىق تانىتۋعا، كۇماندى دەرەككوزدەن الىنعان جالعان اقپاراتقا سەنبەۋگە شاقىردى.