ورالدا مەكتەپ قۇرىلىسى توقتاپ قالدى

قۇرىلىس جوباسى ينۆەستور ەسەبىنەن باستالعان

ورالدا ەكى جىل بۇرىن كۇرەپ تاستاعان №31 مەكتەپتىڭ ورنىنا جاڭاسى ءالى سالىنعان جوق. تەك ىرگەتاسى عانا قۇيىلعان. 

ءقازىر 400-دەن استام وقۋشى تەمىر جولدىڭ ارعى بەتىندەگى مەكتەپكە قاتىناپ وقيدى. قۇرىلىس جوباسى ينۆەستور ەسەبىنەن باستالعان ەدى. العاشىندا جەر داۋى تۋىندادى. ول ماسەلە شەشىلگەنىمەن قۇرىلىس ۋاقىتىلى جۇرگىزىلمەدى. ءقازىر مۇلدە توقتاپ قالدى. جاڭا عيماراتتى سارىلا كۇتكەن تۇرعىندار بالالاردىڭ جاعدايىنا الاڭدايدى. جول ۇزاق، ونىڭ ۇستىنە تەمىر جولدان ءوتۋ ءقاۋىپتى. ال اكىمدىك وكىلدەرى قۇرىلىستىڭ توقتاۋىن ماتەريالداردىڭ قىمباتتاۋىمەن بايلانىستىرىپ وتىر.

«وبلىستا ءۇش اۋىسىممەن ءبىلىم بەرەتىن 10 مەكتەپ جانە اپاتتى دەپ تانىلعان 6 مەكتەپ ماسەلەسىن شەشۋ ءۇشىن بىزگە 16 جىل كەرەك. الايدا ۋاقىت ۇنەمدەۋ ءۇشىن ءبىز سالاعا ينۆەستورلاردى تارتىپ وتىرمىز. تەك ماتەريالداردىڭ قىمباتتاپ كەتۋى كەدەرگى بولىپ تۇر. №31 مەكتەپتىڭ قۇرىلىسى بويىنشا ينۆەستور نەسيە راسىمدەپ جاتىر. قارىز العان سوڭ ءتيىستى جۇمىسىن جالعاستىرادى. كەلىسىم-شارت بويىنشا جوبا 2023 جىلى اياقتالۋى قاجەت. سوعان دەيىن عيماراتتى سالىپ ۇلگىرەدى»،-دەدى وبلىستىق قۇرىلىس باسقارماسىنىڭ باسشىسى الىبەك انتازييەۆ.