الماتىدا جازۋشى، دراماتۋرگ ورالحان بوكەيدىڭ 80 جىلدىق مەرەيتويىن اتاپ ءوتۋ جالعاسىپ جاتىر. ءال-فارابي اتىنداعى قازاق ۇلتتىق ۋنيۆەرسيتەتىنىڭ كىتاپحاناسىندا كورنەكتى تۇلعانىڭ قۇرمەتىنە «ورالحان بوكەي – كورنەكتى رەداكتور، كوركەمسوز شەبەرى» اتتى حالىقارالىق عىلىمي-تاجىريبەلىك كونفەرەنسيا ءوتتى، دەپ حابارلايدى اlmaty-akshamy.kz.
جيىنعا قارا شاڭىراقتىڭ ۇستازدارى مەن اقىندار، قوعام قايراتكەرلەرى مەن بىلىمگەرلەر قاتىسىپ، جاس بۋىنعا جاقىن بولعان جازۋشىنىڭ جارقىن عۇمىرىن ەسكە الدى.
– ورەكەڭنىڭ شىعارماشىلىعى قاي زاماندا دا وقىرمانىن دا، ىزدەنۋشىلەردى دە وزىنە قاراتا بىلگەن ادەبيەتتەگى ۇلكەن قۇبىلىس بولدى. سول قۇبىلىس ءالى دە باسەڭسىگەن جوق. ورالحاننىڭ ومىردەن وتكەنىنە مىنە، بيىل 30 جىلدان اسىپ بارادى. ءبىراق، ورالحاننىڭ شىعارماشىلىعىنىڭ جاس ەكەنىن بۇگىنگى جاستار ايقىنداپ جاتىر، – دەدى جازۋشى، قازاقستاننىڭ ەڭبەك سىڭىرگەن قايراتكەرى نۇرداۋلەت اقىش
ايتا كەتەيىك، ۇلتتىق ادەبيەتتى دامىتۋعا ەلەۋلى ۇلەس قوسقان جازۋشىنىڭ ەسىمىن دارىپتەۋ ماقساتىندا ستۋدەنتتەر اراسىندا ارنايى بايقاۋ جاريالانعان ەدى. باسپاگەرلىك-رەداكتورلىق جانە ديزاينەرلىك ونەر كافەدراسى مەن دەمەۋشىلەر ۇيىمداستىرعان سايىستىڭ قورىتىندىسى وسى جيىندا جاريالاندى. «ەڭ ۇزدىك عىلىمي جۇمىس»، «ەڭ ۇزدىك باسپا ءسوز ماتەريالى» جانە «ديزاين ونەرىنىڭ ۇزدىك تۋىندىسى» نوميناسيالارى بويىنشا جەڭىمپازعا ورالحان بوكەي اتىنداعى شاكىرتاقى بەرىلدى.
– پۋبليسيستيكاسى، جۋرناليستيكاسىنىڭ ءوزى باسقالاردان ەرەكشەلەنىپ تۇراتىن. سول ادەمى جۋرناليستيكاسىن ادەمى جازۋشىلىققا اينالدىرا ءبىلدى. ورالحاننىڭ كەز كەلگەن شىعارماسى، «سايتان كوپىرى»، «اتاۋ كەرەسى»، وچەركتەرى ەڭ الدىمەن ءبىرىنشى پلانعا ادامدى شىعارىپ سويلەتەتىن. بارلىعىندا ورالحان ەڭ الدىمەن ەلدىڭ، حالىقتىڭ جاعدايى، بولاشاعى تۋرالى ءسوز قوزعايتىن، –دەدى جازۋشى، مەملەكەتتىك سىيلىقتىڭ لاۋرەاتى كادىربەك سەگىزباي ۇلى.