ەلوردادا حالىقارالىق «EURASIAN BOOK FAIR — 2023» كىتاپ كورمە-جارمەڭكەسى ءوتىپ جاتىر.
جارمەڭكەگە تمد، ەۋروپا مەن ازيا ەلدەرىنىڭ باسپا ۇيلەرى، كىتاپ دۇكەندەرى، ءعىلىمي-بىلىم بەرۋ جانە پوليگرافيا كومپانيالارى قاتىسىپ جاتىر. قۋانتارلىعى كەلۋشىلەردىڭ قاتارى كوپ، دەپ حابارلايدى Almaty-akshamy.kz Egemen.kz-كە سىلتەمە جاساپ.
Egemen.kz ءتىلشىسى وسى تۇستا قازاق وقىرماندارىنىڭ نە وقىپ جۇرگەنىن تانىمال باسپا ۇيلەرىنەن سۇراپ كورگەن:
«فوليانت» باسپاسى: ءقازىر وقىرمان سۇرانىسى ءارتۇرلى. ءبىراق، قازاق جازۋشىلارى كوپ وقىلادى. سونىڭ ىشىندە ەڭ كوپ سۇرانىستا دەپ دۋلات يسابەكوۆتىڭ «قارعىن» كىتابىن ايتۋعا بولادى. جاستار كوپ وقيدى. ودان كەيىن تاريحي كىتاپتار، ماسەلەن، «كوشپەندىلەردى» سۇرايدى. مۇحتار ءماعاۋيننىڭ كىتاپتارىن الادى. عابيت مۇسىرەپوۆتىڭ «ۇلپان» رومانى دا وقىلىمدى. اباي قۇنانباي ۇلىنىڭ قارا سوزدەرىن ىزدەپ جاتادى.
بىزدە بالالار ادەبيەتى دە سۇرانىسقا يە. سونىڭ ىشىندە مەكتەپ جاسىنداعى بالالار «مەنىڭ اتىم قوجانى» جاقسى كورەدى.
«مازمۇنداما» باسپاسى: بىزدە كوبىنە موتيۆاسيالىق، پسيحولوگيالىق كىتاپتار سۇرانىسقا يە. وقىرماندار سول باعىتتاعى كىتاپتاردى كوپ الادى. سوڭعى كەزدەردەگى توپ-3 كىتاپتى اتاپ وتۋگە بولادى. ءقازىر بىزدە ءبىرىنشى ورىندا جاقىندا جارىق كورگەن پەريزات مىرزاحمەتتىڭ «ءومىردىڭ اتى م» كىتابى بولسا، ەكىنشى ورىندا «تارماقتار» جوباسى شىعارعان كىتاپ. كوپ وقىرمان ىزدەپ كەلەدى. ول كىتاپتا قازاق اقىندارىنىڭ ولەڭ جولدارى جازىلعان ءارى كىتاپتاعى QR ارقىلى ولەڭدى تىڭداۋعا بولادى. ال ءۇشىنشى ورىندا «فەرراريىن ساتقان موناح» كىتابى دەر ەدىم. ودان كەيىنگى ءتىزىمدى موتيۆاسيالىق، پسيحولوگيالىق كىتاپتارمەن جالعاستىرۋعا بولادى.
«Qasym kitap» باسپاسى: ءبىزدىڭ كىتاپتار - كلاسسيكالىق ادەبيەتتەر. ياعني وقىرماندارىمىز دا كلاسسيكانى جاقسى كورەتىن، ىزدەپ وقيتىندار. جاس وقىرماندارىمىز وتە كوپ. سولاردىڭ اراسىندا دۋلات يسابەكوۆتىڭ «قارعىن»، «گاۋحارتاس» روماندارى مەن ءازىلحان نۇرشايىقوۆتىڭ «ماحاببات، قىزىق مول جىلدار» رومانى وتە كوپ وقىلادى.
«وتباسى حرەستوماتياسى» باسپاسى: بىزدەگى ەڭ وقىلىمدى، سۇرانىسقا يە كىتاپ - ول «بەيسەن جانە بولمىس». ودان كەيىن اتا-انا مەن بالاعا ارنالعان كىتابىمىز بار. ىشىندە كۇن سايىن ورىنداۋعا ارنالعان تاپسىرمالارى بار، شاعىن ەرتەگىسى بار، حيكاياسى بار، ءبىر وقيعاسى بار، ىبىراي ءالتىنساريننىڭ، احمەت بايتۇرسىن ۇلىنىڭ مىسالدارى بار. 30 ساباقتان تۇراتىن جيناق. ودان كەيىن كەزىندە الاش ازاماتتارى اۋدارعان اڭگىمەلەردى شىعارعانبىز. ول دا سۇرانىستا، ءوز وقىرماندارى بار.