سوڭعى كەزدە كوللاگەن دەنساۋلىق پەن سۇلۋلىققا ارنالعان ەڭ تانىمال دۇنيەگە اينالدى. ونى «جاستىقتىڭ سيقىرلى ەليكسيرى» دەپ تە اتايدى. ءبىراق كوللاگەن راسىمەن پايدالى ما، الدە بۇل جاي عانا ماركەتينگ ءتاسىلى مە؟
كوللاگەن دەگەن نە جانە ونى نە ءۇشىن ىشەدى؟
كوللاگەن – بۇل تىندەردىڭ سەرپىمدىلىگى مەن بەرىكتىگىنە جاۋاپ بەرەتىن اقۋىز. ول ادام اعزاسىنىڭ «قاڭقاسىن» قالىپتاستىرادى: تەرىدەن باستاپ شەمىرشەككە دەيىن بارلىق جەردە كەزدەسەدى. كوللاگەن – ەڭ كەڭ تارالعان قۇرىلىمدىق اقۋىز، ول اعزاداعى بارلىق اقۋىزداردىڭ شامامەن 30%-ىن قۇرايدى.
كوللاگەن قۇرامىندا اعزا ءۇشىن اسا ماڭىزدى گليسين، پرولين جانە گيدروكسيپرولين اتتى ءۇش امينقىشقىل كوپ مولشەردە بولادى. ولار بىرىگىپ، شيىرشىق ءتارىزدى قۇرىلىم تۇزەدى. بۇل سينتەزگە س دارۋمەنى، مىرىش، مىس، مارگانەس جانە گليسين كومەكتەسەدى. اتالعان ميكروەلەمەنتتەر جەتىسپەسە، كوللاگەننىڭ ءتۇزىلۋى باياۋلايدى.
نەلىكتەن كوللاگەندى تولىقتىرۋ قاجەت؟
25 جاستان كەيىن ورگانيزمدە كوللاگەننىڭ ءتۇزىلۋى بىرتىندەپ ازايا باستايدى. ال زياندى ادەتتەر، سوزىلمالى سترەسس، ۋلتراكۇلگىن ساۋلەدەن قورعانباۋ بۇل ۇدەرىستى ودان ءارى جەدەلدەتەدى.
كوللاگەن جەتىسپەگەن جاعدايدا:
تەرىگە ءاجىم ءتۇسىپ،،
بۋىندار اۋىرىپ،
بۇلشىقەت السىرەيدى،
تىرناق سىنعىش بولىپ،
قان اينالىمى بۇزىلادى،
اسقازان-ىشەك جولىندا ماسەلە تۋىنداپ، اس قورىتۋ جۇيەسىنىڭ شىرىشتى قاباتى توزادى.
كوللاگەننىڭ اسەرى مەن پايدالى قاسيەتتەرى
كوللاگەن – تەك تەرى مەن شەمىرشەككە عانا ارنالعان «قۇرىلىس ماتەريالى» ەمەس. ونىڭ باسقا دا مىناداي ماڭىزدى قىزمەتتەرى بار:
تىندەردى نىعايتادى، ءسىڭىر مەن شەمىرشەكتىڭ قالپىنا كەلۋىنە كومەكتەسەدى؛
سۇيەكتىڭ تىعىزدىعىن ارتتىرادى؛
قاننىڭ ۇيۋىنا قاتىسادى؛
ەسكىرگەن جاسۋشالاردىڭ ورنىن تولتىرۋعا ىقپال ەتەدى؛
جۇرەك-قانتامىر جۇيەسىنىڭ ساۋلىعىنا اسەر ەتەدى.
كوللاگەندى تۇراقتى قابىلداۋ 4–6 اپتادان كەيىن تەرى جاعدايىنىڭ جاقسارۋىنا اسەر ەتۋى مۇمكىن. الايدا ماڭىزدى ءبىر جايت بار: كوللاگەن اسقازانعا تۇسكەن سوڭ امينقىشقىلدارعا ىدىرايدى، ال اعزا ولاردى ءوز قاجەتتىلىگىنە قاراي پايدالانادى. بۇل ۇدەرىستى مەملەكەتتىڭ بيۋدجەت بولۋىمەن سالىستىرۋعا بولادى: ەگەر اعزادا بەلگىلى ءبىر ماسەلە (مىسالى، شاش ءتۇسۋى) باسىم بولسا، رەسۋرستار سول باعىتقا جۇمسالادى. سوندىقتان اسەرىن كورىپ، پايداسىن سەزۋ ءۇشىن كوللاگەندى دۇرىس تاماقتانۋ جانە سالاۋاتتى ءومىر سالتىمەن قاتار قابىلداۋ ماڭىزدى.
كوللاگەننىڭ پايداسى مەن زيانى
1. تەرىگە اسەرى
زەرتتەۋلەردە ايەلدەر تاۋلىگىنە 1–12 گ كوللاگەندى 4–12 اپتا بويى قابىلداعان. ناتيجەسىندە تەرى سەرپىمدىلىگى مەن ىلعالدىلىعى ارتقان. بۇل كەزدە تاماقتانۋ مەن ءومىر سالتى وزگەرتىلمەگەن.
2. بۋىندارعا اسەرى
كوللاگەن جەتىسپەگەندە ءجيى كەزدەسەتىن اۋرۋ – وستەوارتريت. زەرتتەۋلەر كوللاگەن قوسپاسى بۋىنداردىڭ قوزعالىسىن جاقسارتاتىنىن كورسەتكەن، ءبىراق اۋرۋدىڭ ءوزىن تولىق ەمدەمەيدى.
3. شاش پەن تىرناق
تاجىريبە جانۋارلارعا جۇرگىزىلگەن. كوللاگەن پەپتيدتەرى شاش ءوسۋ فازاسىن بەلسەندىرىپ، فولليكۋلداردىڭ تەرەڭدەۋىنە ىقپال ەتكەن. بۇل شاشتىڭ تەز ءارى تىعىز وسۋىنە ىقپال ەتكەن.
4. سۇيەك ساۋلىعى
پوستمەنوپاۋزا كەزەڭىندەگى ايەلدەرگە جۇرگىزىلگەن زەرتتەۋدە كوللاگەن، كالسيي جانە D دارۋمەنىن بىرگە قابىلداعان توپتا سۇيەكتىڭ مينەرالدى تىعىزدىعى جاقسى ساقتالعان.
زيانى بار ما؟
كوللاگەن قوسپالارى ادەتتە ءقاۋىپسىز، ءبىراق مىناداي جاعىمسىز اسەرلەرى بولۋى مۇمكىن:
اللەرگيالىق رەاكسيالار (اسىرەسە بالىق نەمەسە سيىر اقۋىزىنا)؛
اسقازاننىڭ كەبۋى، جۇرەك اينۋى؛
جاعىمسىز ءيىس نەمەسە ءدام (تومەن ساپالى ونىمدەردە).
ءقاۋىپتى قالاي ازايتۋعا بولادى؟
سەرتيفيكاتى بار، سەنىمدى برەندتەردى تاڭداڭىز؛
قابىلداۋدى از مولشەردەن باستاڭىز؛
قۇرامىن مۇقيات وقىڭىز.
كوللاگەن شىنىمەن كومەكتەسە مە؟
ءيا، كومەكتەسەدى. ءبىراق بۇل – بىردەن اسەر ەتەتىن «سيقىرلى تابلەتكا» ەمەس. كوللاگەننىڭ ناتيجەسى بىرنەشە اپتا نەمەسە ايلار بويى تۇراقتى قابىلداعاندا عانا بايقالادى.
ناتيجەسى قاشان بىلىنەدى؟
4–6 اپتادان كەيىن تەرىنىڭ ىلعالدىعى مەن سەرپىمدىلىگى ارتادى؛
كەمىندە 3 اي تۇراقتى قابىلداعان كەزدە سۇيەك پەن بۋىنداردىڭ قالپىنا كەلۋىنە كومەكتەسەدى.
P.S وسى ماتەريال دايىندالىپ جاتقان كەزدە الماتى قالاسىندا كوللاگەن وندىرەتىن زاۋىتتىڭ قۇرىلىسى باستالعانى تۋرالى اقپارات كەلىپ ءتۇستى. الماتىلىق قىز-كەلىنشەكتەرگە جەرگىلىكتى ءوندىرىستىڭ ءونىمىن تۇتىناتىن كۇننىڭ اۋىلى الىس ەمەس.