قوعامداعى داۋلى ماسەلەگە قاتىستى بۇگىن مەملەكەت باسشىسى دا پىكىر ءبىلدىردى.
پرەزيدەنت بالالار ەسەيىپ، دۇنيەتانىمى تولىق قالىپتاسقان سوڭ ءوز تاڭداۋىن جاساعانى دۇرىس دەپ سانايدى، دەپ حابارلايدى Almaty-akshamy.kz
"مەن قوعامدا ءجيى تالقىلاناتىن تاعى ءبىر ماسەلەگە توقتالعىم كەلەدى. قازاقستان – كونستيتۋسيا بويىنشا زايىرلى مەملەكەت. بۇل قاعيدا بارلىق جەردە، سونىڭ ىشىندە ءبىلىم بەرۋ مەكەمەلەرىندە قاتاڭ ساقتالۋعا ءتيىس"، - دەدى پەداگوگتەر سەزىندە توقايەۆ.
ول مەكتەپ ەڭ الدىمەن، ءبىلىم ورداسى ەكەنىن، بالالار مەكتەپكە ءبىلىم الۋ ءۇشىن باراتىنىن اتاپ ءوتتى.
"ال ءدىني ۇستانىم – ءار ازاماتتىڭ جەكە ماسەلەسى، ءوز تاڭداۋى. ەلىمىزدە ءدىن بوستاندىعىنا زاڭمەن كەپىلدىك بەرىلگەن. بالالارىمىز ەسەيىپ، دۇنيەتانىمى تولىق قالىپتاسقان سوڭ ءوز تاڭداۋىن جاساعانى دۇرىس دەپ سانايمىن. ەڭ باستىسى، كوزقاراسى ايقىن، ساناسى سەرگەك ءارى داستۇرگە بەرىك ۇرپاق تاربيەلەۋ كەرەك"، - دەدى قاسىم-جومارت توقايەۆ.
ونىڭ ايتۋىنشا، جالپى، زايىرلى دەگەن ءسوزدىڭ مازمۇنى تەرەڭ، وتە اۋقىمدى.
"حالقىمىزعا قاتىستى ايتاتىن بولساق، بۇل – سالاۋاتتى ءومىر سالتىن ۇستانۋ، پراگماتيكالىق كوزقاراستا بولۋ جانە ءداستۇرلى دىنىمىزگە، ۇلتتىق سانانى ارقاۋ ەتكەن سالتىمىزعا شىنايى قۇرمەت دەگەن ءسوز"، - دەپ تۇيىندەدى پرەزيدەنت.