بۇل دوداعا 26 ەلدىڭ 281 كومانداسى قاتىستى.
ءحىح حالىقارالىق جاۋتىكوۆ وليمپياداسىندا قازاقستاندىق وقۋشىلار 66 مەدال جەڭىپ الدى، دەپ حابارلايدى Almaty-akshamy.kz وقۋ-اعارتۋ مينيسترلىگى باسپا ءسوز قىزمەتىنە سىلتەمە جاساپ.
مينيسترلىكتىڭ مالىمەتىنشە، وقۋشىلار 6 التىن، 20 كۇمىس، 40 قولا مەدالعا يە بولدى. جەڭىمپازدار ەلىمىزدىڭ جەتەكشى جوعارى وقۋ ورىندارىنىڭ اتاۋلى سىيلىقتارى مەن ءبىلىم گرانتتارىن يەلەندى.
ۆەدومستۆو وكىلدەرىنىڭ حابارلاۋىنشا، 26 ەلدىڭ 281 كومانداسى 10 كۇن بويى ماتەماتيكا، فيزيكا جانە ينفورماتيكا ءپانى بويىنشا سىنعا تۇسكەن. قازاقستاننان قۇرامىندا 250 وقۋشىسى بار 35 كوماندا ب ا ق سىنادى. ءداستۇرلى حالىقارالىق جاۋتىكوۆ وليمپياداسىنا قازاقستان، ءازىربايجان، وزبەكستان، رەسەي، گرۋزيا، رۋمىنيا، سەربيا، ۋكراينا، ءۇندىستان، تۇركيا، ۇلىبريتانيا جانە باسقا دا ەلدەردىڭ فيزيكا-ماتەماتيكا باعىتىنداعى مامانداندىرىلعان مەكتەپتەرىنەن جالپى 1200-دەن اسا وقۋشى قاتىستى.
«حالىقارالىق جاۋتىكوۆ وليمپياداسى وقۋشىلار اراسىندا تانىمال بولا ءتۇستى. وليمپيادا كەزىندە قاتىسۋشىلار كۇردەلى ماتەماتيكالىق ەسەپتەردى شەشەدى. مۇنداي زياتكەرلىك كونكۋرستار ولاردىڭ ءبىلىمىن تەرەڭدەتىپ قانا قويماي، بالالاردى كوماندادا جۇمىس ىستەۋگە، دوستىق قارىم-قاتىناس ورناتۋعا ۇيرەتەدى»، – دەپ اتاپ ءوتتى رفمم باسقارما ءتوراعاسى رۋسلان قالييەۆ.
حالىقارالىق جاۋتىكوۆ وليمپياداسى وقۋ-اعارتۋ مينيسترلىگىنىڭ قولداۋىمەن رەسپۋبليكالىق فيزيكا-ماتەماتيكا مەكتەبىنىڭ بازاسىندا ءوتتى.