وقۋشىلاردىڭ پسيحولوگياسى قاي دەڭگەيدە؟

بۇل باعىتتا ءبىرقاتار شارۋالار قولعا الىنعان

ق ر پرەمەر-مينيسترىنىڭ ورىنباسارى ەرالى توعجانوۆ مەكتەپ وقۋشىلارى اراسىندا وتكەن دارىگەرلىك تەكسەرۋلەردىڭ نەگىزگى كورسەتكىشتەرىن ايتتى، دەپ حابارلايدى Almaty-akshamy.kz

«2021 جىلى تەرەڭدەتىلگەن تۇردە دارىگەرلىك تەكسەرۋمەن مەكتەپتەردەگى 2 911 777 بالا قامتىلۋى ءتيىس ەدى. ونىڭ ىشىندە 2 480 540-ى تەكسەرۋدەن ءوتتى. بىلتىر اقمولا جانە ماڭعىستاۋ وبلىستارىندا وقۋشىلاردى مەديسينالىق تەكسەرۋ ۇلەسى تومەن دەڭگەيدە بولدى»، - دەپ جازدى ە. توعجانوۆ دەپۋتاتتىق ساۋالعا جاۋاپ بەرە وتىرىپ.

بۇل تەكسەرۋلەرگە جاسالعان تالداۋعا قاراعاندا، ءبىرىنشى ورىندا كورۋ ورگاندارىنىڭ پاتولوگياسى تۇر. بۇل تۇرعى 2021 جىلى 60 490 وقۋشى، ال 2020 جىلى 22 795 بالا تىركەلدى. ونىڭ سوزىنە قاراعاندا، وقۋشىلاردىڭ كوز كورۋىنىڭ ناشارلاۋىنىڭ نەگىزگى سەبەپتەرى رەتىندە ولاردى اقپاراتتىق تەحنولوگيالارعا، ءبىلىم بەرۋدى كومپيۋتەرلەندىرۋ ۇردىسىنە قاتىستىرۋ بولىپ تۇر. ياعني گادجەتتەر مەن ۇيالى تەلەفونداردى پايدالانۋ بەلسەندىگىنىڭ ارتۋى، الەۋمەتتىك جەلىلەر ارقىلى اقپاراتتىق جۇكتەمەنىڭ شەكتەن تىس بولۋى، كورۋ قابىلەتىن ساقتاۋ رەجيمىن ەلەمەۋ سياقتى ماسەلەلەر بار.

ەكىنشى ورىندا جۇيكە-پسيحيكالىق اۋرۋى تۇر. بۇل اۋرۋ ءتۇرى 2020 جىلمەن سالىستىرعاندا 2،7 ەسەگە ارتقان (2021 جىلى – 15 946، 2020 جىلى – 5 872). بۇعان پسيحوەموسيونالدى جاعدايدىڭ كوتەرۋلى، الەۋمەتتىك جەلى ارقىلى اقپاراتتىق جۇكتەمەنىڭ ارتۋى، گادجەتتەرگە پسيحولوگيالىق تاۋەلدىلىك، تاۋلىك ىشىندە دۇرىس رەجيمدى ساقتاماۋ سەبەپ بولىپ وتىر.

ءۇشىنشى ورىندا وقۋشىلاردىڭ ارقا ومىرتقاسىنىڭ قيسايۋى ماسەلەسى بار. 2021 جىلى 6 112 بالادا سكوليوز انىقتالدى (2020 جىلى - 2517). وسى ورايدا وقۋشىلاردىڭ از قوزعالۋى، مەكتەپ جيھازىنىڭ بالالاردىڭ جاس ەرەكشەلىكتەرىنە قاراي سايكەس كەلمەۋى، ورىندىققا وتىرۋ كەزىندە تالاپ ەتىلەتىن ءتيىستى ەرەجەلەردى ەلەمەۋ جانە باسقا دا كەمشىلىكتەر اسەر ەتىپ وتىر.