تەگىن تاماقپەن قامتۋ پرواكتيۆتى قىزمەت تۇرىندە بولادى.
ەلىمىزدە مەكتەپ وقۋشىلارىن تەگىن ىستىق تاماقپەن قامتۋ پرواكتيۆ قىزمەت تۇرىندە ىسكە قوسىلادى. بۇل تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى مالىك ولجابەكوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تۇراقتى دامۋدىڭ 17 ماقساتى بار. سول ماقساتتارعا جەتۋ جولىندا سيفرلاندىرۋ سالاسىندا ىسكە اسىپ جاتقان كەيبىر جوباعا توقتالسام. الدىمەن كەدەيلىكپەن كۇرەس. بۇل ورايدا ەڭبەك جانە حالىقتى الەۋمەتتىك قورعاۋ مينيسترلىگى وتباسىنىڭ سيفرلىق كارتاسىن ازىرلەپ جاتىر. سول ارقىلى ءار وتباسىنىڭ الەۋمەتتىك جاعدايى انىقتالادى. سيفرلىق كارتادا وتباسى مۇشەلەرى تۋرالى مالىمەت بولادى. ەكىنشى ماقسات – اشتىقپەن كۇرەس. ۇلتتىق جوبا اياسىندا اگروونەركاسىپ سالاسىندا كورسەتىلەتىن قىزمەتتەر مەن مەملەكەتتىك قولداۋ اۆتوماتتاندىرىلىپ جاتىر»، - دەدى مالىك ولجابەكوۆ استانادا ءوتىپ جاتقان ادام جانە عالامشارعا ارنالعان سيفرلىق شەشىمدەر تاقىرىبىنداعى كونفەرەنسيادا.
ونىڭ ايتۋىنشا، فەرمەرلەرگە ارنالعان مەملەكەتتىك سۋبسيديا بەرۋ پروسەسىن سيفرلاندىرىپ، اۆتوماتتاندىرۋ پروسەسى ءجۇرىپ جاتىر.
«سونداي-اق، بيىل قيىن جاعدايعا تاپ بولعان وتباسىلاردىڭ مەكتەپ جاسىنداعى بالالارىن تەگىن تاماقپەن قامتۋ پرواكتيۆتى قىزمەت تۇرىندە ىسكە قوسىلادى»، - دەيدى ول.
ايتا كەتسەك، بيىل 1 جەلتوقسانعا دەيىن ەلىمىزدە الەۋمەتتىك سالادا 13،1 ملن قىزمەت كورسەتىلدى. ونىڭ ىشىندە 10،6 ملن قىزمەت ەلەكتروندى جانە 1،0 ملن قىزمەت پرواكتيۆتى تۇردە ۇسىنىلدى.
بۇعان دەيىن حابارلاعانىمىزداي، كەلەسى جىلدان باستاپ ەلىمىزدە وتباسىنىڭ سيفرلىق كارتاسى ەنگىزىلمەك.