ونىڭ 101ء-ى تۇركىستان وبلىسىنا جونەلتىلەدى.
ەلىمىزدە مەكتەبى جوق نەمەسە باستاۋىش مەكتەبى عانا بار اۋىلداردىڭ بالالارىن جاقىن ماڭداعى ءبىلىم بەرۋ ۇيىمدارىنا ءقاۋىپسىز تاسىمالداۋ ءۇشىن 515 جاڭا اۆتوبۋس ساتىپ الىنادى، دەپ حابارلايدى Almaty-akshamy.kz
بۇل تۋرالى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى دۋلات جەكەبايەۆ ايتتى.
«بالالاردى ءقاۋىپسىز تاسىمالداۋ - ءبىزدىڭ باقىلاۋىمىزداعى ماڭىزدى ماسەلەلەردىڭ ءبىرى جانە ءبىز وسى ماسەلەنى ۇنەمى كوتەرىپ كەلەمىز. بيىل بالالار جىلى اياسىندا قاۋىپسىزدىك تالاپتارىنا ساي كەلەتىن 515 جاڭا اۆتوبۋس ساتىپ الۋ ءۇشىن رەسپۋبليكالىق بيۋدجەتتەن اقشا ءبولىندى. جاڭا اۆتوبۋستار قاۋىپسىزدىك بەلدىكتەرىمەن، مەكتەپ سومكەسىنە ارنالعان سورەلەرمەن، ەسىكتەرى اشىق كەزدە قوزعالىستى تەجەيتىن مەحانيزممەن جانە تاعى دا باسقا قاۋىپسىزدىك قۇرالدارىمەن جابدىقتالعان»، – دەدى دۋلات جەكەبايەۆ.
كوميتەت ءتوراعاسىنىڭ ورىنباسارى اۆتوبۋستاردى ساتىپ الۋعا بولىنگەن قارجىنى يگەرۋ جەرگىلىكتى اكىمدىكتەردىڭ قۇزىرەتىندە ەكەندىگىن ايتادى. قوعامدىق كولىكتەر ەلىمىزدە قۇراستىرىلاتىن بولعاندىقتان، قوماقتى تاپسىرىس وتاندىق ءاۆتووندىرىس سالاسىن دامىتۋعا دا ۇلكەن ۇلەس قوساتىنىنا سەنىمدى.
سوزىنشە، ەڭ باستىسى، بالالارعا ءقاۋىپسىز، جايلى اۆتوبۋستارمەن قاتىناۋعا جاعداي جاسالادى.
«جاڭا اۆتوبۋستار اقمولا، اقتوبە وبلىستارى سياقتى ءبىرقاتار وڭىرگە جەتكىزىلىپ، تاراتىلىپ جاتىر. ءبىز ەلىمىزدىڭ بارلىق ايماعىنداعى مەكتەپ اۆتوبۋستارىن كەزەڭ-كەزەڭىمەن جاڭارتامىز. ءبىرىنشى كەزەكتە پروبلەما بار وڭىرلەردى اۆتوبۋسپەن قامتۋدى جوسپارلاپ وتىرمىز. ماسەلەن، 515 اۆتوبۋستىڭ 101ء-ى تۇركىستان وبلىسىنا جونەلتىلەدى»، – دۋلات جەكەبايەۆ.