الماتىدا ۇشەم دۇنيەگە كەلدى

ومىرگە ەكى قىز، ءبىر ۇل بالا كەلدى.

الماتىدا ەكستراكورپورالدى ۇرىقتاندىرۋ ارقىلى ۇشەم دۇنيەگە كەلدى. جاركەنتتەن كەلگەن جاس وتباسى ەكى قىز بەن ءبىر ۇلدىڭ اتا-اناسى اتاندى. بۇل تۋرالى مەديسينالىق ساقتاندىرۋ قورى الماتى قالالىق فيليالىنىڭ باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

29 جاستاعى گۋنچيگۇل جۇبايى ەكەۋى - بىرنەشە جىلدان بەرى ءبىر پەرزەنتكە زار بولعان وتباسىلاردىڭ ءبىرى. ايتۋىنشا، مۇنداي باقىتقا كەنەلەم دەپ ەشقاشان ويلاماپتى.

«تۇرمىس قۇرعالى بەرى 4 جىل بويى بالا كوتەرە المادىم. بارماعان جەرىم، باسپاعان تاۋىم قالعان جوق. ەم-دوم ەش ناتيجە بەرمەگەن سوڭ، انا بولۋدان ءتىپتى كۇدەرىمدى ۇزە باستادىم»، - دەپ ەسكە الادى ول.

ايتۋىنشا، دارىگەرلەر دەنساۋلىعىنا بايلانىستى وعان «بەدەۋلىك» دەگەن دياگنوز قويعان. ءبىراق جاقسىلىقتان ءۇمىت ۇزبەي، بىلىكتى دارىگەر ىزدەۋدى توقتاتپاعان.

ءسويتىپ الماتىداعى رەپرودۋكتيۆتى مەديسينا ورتالىعىنا كەلگەن.

«سول كەزدە ەكو-نى مىندەتتى الەۋمەتتىك مەديسينالىق ساقتاندىرۋ ارقىلى جاساتۋعا بولاتىنىن ەستىپ، قاتتى قۋاندىم. سەبەبى ەكو وتە قىمبات، ونى ەكىنىڭ ءبىرىنىڭ قالتاسى كوتەرە بەرمەيدى. بۇل مەن ءۇشىن دە اقىرعى مۇمكىندىك بولدى. سول سەبەپتى ەمحاناداعى دارىگەرگە بارىپ كەزەككە تۇرىپ، قارالا باستادىم. البەتتە، مەن سياقتىلار وتە كوپ، سوندىقتان كەزەك كۇتۋگە تۋرا كەلدى. مەن شىدامدىلىق تانىتىپ، كۇتتىم. سوڭىندا ۇلكەن باقىتقا كەنەلدىك. ومىرگە ەكى قىز، ءبىر ۇل بالا اكەلدىم»، - دەيدى ۇشەمنىڭ اناسى.

ەستەرىڭىزگە سالا كەتسەك، باعاسى قىمبات قىزمەتتەردىڭ ءبىرى- ەكستراكورپورالدى ۇرىقتاندىرۋ 2020 جىلدان بەرى قاراي مىندەتتى الەۋمەتتىك مەديسينالىق ساقتاندىرۋ ارقىلى قارجىلاندىرىلىپ كەلەدى.

2022 جىلدىڭ ءبىرىنشى جارتىسىندا وسىنداي 1304 جۇپ ەكو جاساتقان. وعان ساقتاندىرۋ ەسەبىنەن 1،3 ملرد تەڭگە ءبولىندى.