سۋ تاسقىنى ورىن العان ايماقتارداعى مەكتەپتەردە ساباق ونلاين فورماتقا كوشىرىلەدى
سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتاب جۇمىسىنىڭ اياسىندا 88 ءبىلىم بەرۋ ۇيىمى ءتورتىنشى توقساندى قاشىقتان وقىتۋ فورماتىندا باستايدى. بۇل تۋرالى ق ر وقۋ-اعارتۋ مينيسترلىگىنىڭ رەسمي وكىلى حابارلادى.
قاشىقتان وقىتۋ سۋ تاسقىنى ءقاۋپى سەيىلمەگەن اۋماقتارداعى 56 مەكتەپتە، سونداي-اق ەۆاكۋاسيالىق پۋنكتتەر رەتىندە ايقىندالعان 32 مەكتەپتە ۇيىمداستىرىلىپ وتىر.
«وسى دۇيسەنبىدەن باستاپ 3 ملن-نان استام قازاقستاندىق وقۋشى ءۇشىن 2023-2024 وقۋ جىلىنىڭ ءتورتىنشى توقسانى باستالادى. بۇل رەتتە سۋ تاسقىنى جاعدايى ساقتالعان وڭىرلەردەگى وقۋشىلار قاشىقتان وقۋعا كوشىرىلەدى. جەرگىلىكتى جەرلەردە وقۋ-اعارتۋ مينيسترلىگىنىڭ اۋماقتىق ءبىلىم بەرۋ سالاسىندا ساپانى قامتاماسىز ەتۋ دەپارتامەنتتەرى مەن وڭىرلىك ءبىلىم باسقارمالارى جۇمىس جاساۋدا. ەۆاكۋاسيالىق بەكەتتەردەگى بالالارعا قاجەتتى كومەك كورسەتۋ ءۇشىن پسيحولوگيالىق قىزمەتتەر ىسكە قوسىلدى. بالالار قاشىقتان وقۋ ءۇشىن قاجەتتى وقۋ قۇرالدارىمەن، كيىم-كەشەكپەن جانە تەحنيكالىق قۇرالدارمەن قامتاماسىز ەتىلدى. ەۆاكۋاسيالانعان 1-4 سىنىپ وقۋشىلارىن تاماقتانۋمەن قامتۋ ماسەلەسى بويىنشا جۇمىستار جۇرگىزىلۋدە»، — دەپ اتاپ ءوتتى ۆەدومستۆونىڭ رەسمي وكىلى مەرەكە امانگەلدى قىزى.
وقۋ-تاربيە پروسەسى مەملەكەتتىك جالپىعا بىردەي ءبىلىم بەرۋ ستاندارتتارىنا سايكەس ۇيىمداستىرىلادى. سونداي-اق تاۋەكەلدەردى ازايتۋ جانە توتەنشە جاعدايدا ءبىلىم بەرۋ پروسەسىن جالعاستىرۋدى قامتاماسىز ەتۋ ءۇشىن اقتوبە وبلىسىنداعى كوللەدجدەر قاشىقتان وقىتۋ فورماتىنا اۋىستىرىلدى.