روبوت «قارا جورعا» ءبيىن بيلەيدى
اتىراۋ وقۋشىلارى بيلەيتىن روبوت قۇراستىرىپ شىعاردى. روبوت كۇردەلى قيمىل-قوزعالىستاردى جاساي الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتىراۋداعى اباي ورتالىعىندا 7-11 سىنىپ وقۋشىلارى ءۇشىن تەگىن STEAM كۋرسى بار. مۇندا مەكتەپ وقۋشىلارى ءتۇرلى روبوتتار قۇراستىرىپ، عىلىمي جوبالارمەن اينالىسادى. ماسەلەن، JasSpace كەڭىستىگىندە قوسىمشا ءبىلىم الىپ جۇرگەن قۇرمەت ايىپقالييەۆ پەن دامەلى كىشىباي بيلەيتىن روبوت قۇراستىرعان. قۇرمەت مۇنايلى شاھارداعى №28 مەكتەپتىڭ 7-سىنىبىندا، ال دامەلى APEC كوللەدجىنىڭ 1-كۋرسىندا وقيدى.
«ءبىز بيلەيتىن روبوتتى قۇراستىرۋعا ەكى اي ۋاقىتىمىزدى جۇمسادىق. روبوتتىڭ بىرنەشە ەرەكشەلىگى بار. بىرىنشىدەن، روبوت «قارا جورعا» ءبيىن بيلەيدى. ەكىنشىدەن، اينالاداعى ادامدارمەن بايلانىس جاسايتىن مۇمكىندىگى بار. ۇشىنشىدەن، كۇردەلى قيمىل-قوزعالىستى جاساي الادى. تورتىنشىدەن، ەتنوستيلدەگى روبوت ۋلترادىبىستىق داچيك ارقىلى قوسىلادى»، - دەپ ءتۇسىندىردى دامەلى كىشىباي.
وقۋشىلاردى ونەرتاپقىشتىققا ديار ءابۋحانوۆ باۋلىپ ءجۇر. ونىڭ ايتۋىنشا، وقۋشىلاردىڭ روبوت قۇراستىرۋعا قىزىعۋشىلىعى زور. بۇعان تەوريادان گورى پراكتيكالىق جۇمىسقا باسىمدىق بەرۋ سەپتىگىن تيگىزگەن.
«شەتەلدە جاڭا تەحنولوگياعا، اسىرەسە، ءتۇرلى روبوتتار قۇراستىرۋعا باسا دەن قويىلىپ وتىر. روبوت ادام ەڭبەگىن الماستىرىپ جاتىر. بولاشاقتا قازاقستاننىڭ جاس ونەرتاپقىشتارى باسەكەگە قابىلەتتى جاڭا تەحنولوگيالار ويلاپ تاباتىنىنا سەنەمىن. ال، ءبىز باستاپقىدا روبوتتى كارتوننان دايىنداپ، تەكسەرىپ كوردىك. كەيىن ماكەتتى پەنوپلەكستەن جاساپ شىعاردىق. باسقارۋ باعدارلاماسىن ازىرلەپ، ونى اردۋينو پلاتاسىنا قۇيدىق. ءسويتىپ، تەتىكتى باسقاندا، روبوت بيلەيتىندەي مۇمكىندىك جاسادىق. مۇنان سوڭ روبوتتى ودان ءارى جەتىلدىرۋدى ويلاستىردىق. ءقازىر روبوت روليك ارقىلى قوزعالادى. ەندى ونى اياعىمەن ءجۇرىپ، ادامنىڭ قيمىل-ارەكەتىن كوبىرەك جاسايتىنداي ەتكىمىز كەلەدى»، - دەپ الداعى جوسپارىمەن ءبولىستى قۇرمەت ايىپقالييەۆ.
ەسكە سالا كەتەلىك، بۇدان بۇرىن اتىراۋلىق وقۋشى قىز اساۋ ۇيرەتىپ، ات ۇستىنەن ساداق اتاتىنىن حابارلاعان بولاتىنبىز.