وقۋشى قىزدارعا جاڭا ۆاكسينا سالىنادى

350 000 ەكپە دوزاسى 9 ملرد تەڭگەگە ساتىلىپ الىنادى. ول 170 000 ادامعا جەتەدى. ەكپە ەكى رەت سالىنادى. بۇل ۆاكسينا جاتىر موينى وبىرىن تۋدىراتىن پاپيللوما ۆيرۋسىنىڭ الدىن-الۋ ءۇشىن سالىنادى. ۆاكسينانىڭ ماڭىزدىلىعى تۋرالى «ءبىزدىڭ دارىگەر» جوباسىنا سۇحبات بەرگەن جوعارى ساناتتى ونكوگينەكولوگ باقىتجان الىبەكوۆا ءتۇسىندىرىپ بەردى، دەپ حابارلايدى اlmaty-akshamy.kz. 

دارىگەردىڭ ايتۋىنشا، ەلىمىزدە ايەلدەر اراسىندا جاتىر موينى وبىرى ءسۇت بەزى وبىرىنان كەيىن ەكىنشى ورىندا تۇر. جىل سايىن شامامەن 1800 ايەلگە جاتىر موينى ىسىگى دياگنوزى قويىلادى. ونىڭ ىشىندە شامامەن 600 قىز-كەلىنشەك وسى دەرتتىڭ قۇربانى بولادى. سوندىقتان جاتىر موينى وبىرىنىڭ پروفيلاكتيكاسى رەتىندە سالىناتىن پاپيللوما ۆيرۋسىنا قارسى سالىناتىن ەكپەدەن قورىقپاۋ كەرەك.

بۇل ەكپە نەگە 11 جاسار وقۋشىلارعا سالىنادى دەگەن ساۋال اتا-انالاردى الاڭداتىپ وتىر. سەبەبى اتالمىش ۆاكسينانىڭ ەرەجەسى بويىنشا قىزدار جىنىستىق-قاتىناسقا تۇسپەي تۇرىپ سالىنۋى كەرەك. ەكپە وقۋشى قىزداردىڭ اتا-اناسىنىڭ رۇقساتىمەن عانا سالىنادى.

ادام پاپيللوما ۆيرۋسىنا قارسى ۆاكسينا الەمنىڭ 100-دەن اسا ەلىندە وقۋشىعا قىزدارعا سالىنادى. كەي مەملەكەتتەردە ەكپە ۇلدارعا دا سالىنادى. وسى ۆاكسينانى ارقاسىندا جاتىر موينى وبىرىنا شالدىعاتىن ايەلدەردىڭ سانى 80-90% تومەندەگەن. ال كورشى مەملەكەتتەر قىرعىزستان، وزبەكستان، تۇركمەنستاندا دا وقۋشى قىزدار جاسىنا ساي ەكپە الىپ ءجۇر. ءبىز ۆاكسينادان ەمەس، اۋرۋ تۋدىراتىن ۆيرۋستان قورقۋىمىز كەرەك دەيدى ونكوگينەكولوگ. ايەلدەر اۋرۋدى ەرتە انىقتاۋ ءۇشىن ۋاقىتىلى سكرينينگتەن ءوتۋى ماڭىزدى. ويتكەنى جاتىر موينى وبىرى 3 — 4 ساتىعا وتكەن كەزدە ونىمەن كۇرەسۋ قيىن جانە ول ءومىردى قىسقارتاتىنىن ەستەن شىعارماۋ كەرەك.