وقۋشى قىز ءوز اناسىن ءولتىردى دەگەن كۇدىكپەن ۇستالدى

اناسى ۆاحتالىق ادىسپەن ساۋىنشى بولىپ جۇمىس ىستەگەن

اقتوبەدە 16 جاستاعى مەكتەپ وقۋشىسىنا قاتىستى قىلمىستىق ءىس قوزعالدى. ول اناسىن ءولتىردى دەگەن كۇدىككە ىلىكتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

وقيعا اقتوبە قالاسىندا بولدى. قازىرگى كەزدە قىلمىستىق ءىستىڭ «ادام ءولتىرۋ» بابى بويىنشا ءىس قوزعالىپ، 16 جاستاعى قىز بەن ونىڭ 19 جاستاعى تانىسى كۇدىككە ىلىكتى. وبلىستىق پد باسپا ءسوز قىزمەتىنىڭ حابارلاۋىنشا، سوت الدى تەرگەۋ باستالىپ، كۇدىكتىلەر ۋاقىتشا قامالدى. ال وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا كۇدىكتى قىزدىڭ تولىق ەمەس وتباسىندا تاربيەلەنىپ جاتقانىن ايتتى.

«اناسى ۆاحتالىق ادىسپەن ساۋىنشى بولىپ جۇمىس ىستەگەن. بالا اسا ءبىر بەيادەپ ارەكەتتەرمەن كوزگە تۇسپەگەن. ءبىراق اناسى بىرنەشە رەت بالانى قاراۋسىز قالدىرىپ، سوعان بايلانىستى كامەلەتكە تولماعانداردىڭ ىستەرى جونىندەگى كوميسسيا وتىرىسىنا شاقىرىلعان، ەسكەرتۋ جاسالعان. بالا سالماقتى، ارتىق ىس-ارەكەتتەرى بۇعان دەيىن بايقالماعان. ىشكى ىستەر ورگاندارىنىڭ ەسەبىندە بولماعان. تەك ساعات 23:00-دەن كەيىن كوشەدە ءجۇرىپ، وسى تالاپتى بۇزعانى ءۇشىن بىرنەشە رەت ەسكەرتۋ العان. جانىندا دوس بالاسى بولعان. ول كامەلەتتىك جاسقا تولعان جىگىت. قالاداعى كوللەدجدەردىڭ ءبىرىنىڭ ستۋدەنتى. ءقازىر قايسىسى كىنالى ەكەنىن بىلمەيمىز، ناقتى انىقتالعان جوق»،- دەدى وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.

قىلمىستىق ىسكە قاتىستى تەرگەۋ ءجۇرىپ جاتقان سوڭ وزگە اقپارات تاراتىلمادى.