كوپتەگەن كىتاپتاردى الىپ ءجۇرۋ قاجەتتىلىگى بىرتىندەپ جويىلادى
تاياۋدا وقۋلىقتاردىڭ 100 پايىزى سيفرلاندىرۋدان وتەدى، تيىسىنشە كىتاپتاردى الىپ ءجۇرۋ قاجەتتىلىگى بىرتىندەپ جويىلادى. بۇل تۋرالى باعدارلاماشىلاردى مەرەكەسىمەن قۇتتىقتاعان سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ءوزىنىڭ Facebook-تەگى رەسمي پاراقشاسىندا جازدى، دەپ حابارلايدى Almaty-akshamy.kz ءتىلشىسى.
«مەملەكەت باسشىسىنىڭ تاپسىرماسى بويىنشا ءبىز ارتىق بيۋروكراتيانى جويا وتىرىپ، 175 بيزنەس-ۇدەرىستى جەتىلدىردىك. ال، 2025 جىلعا دەيىن ءبىز 5 مىڭ بيزنەس-پروسەسكە تولىق رەينجينيرينگ جاسايتىن بولامىز. بۇگىنگى كۇنى مەملەكەتتىك قىزمەتتەردىڭ 94%-ى ونلاين تۇردە قولجەتىمدى. ونىڭ ىشىندە 25 قىزمەت پرواكتيۆتى فورماتتا كورسەتىلەدى. ەڭ سۇرانىسقا يە مەملەكەتتىك قىزمەتتەر سمارتفونداردا قول جەتىمدى جانە وتكەن جىلمەن سالىستىرعاندا ولاردى پايدالانۋ 17،5 پايىزعا ارتقان. سونىمەن قاتار، ءبىز حالىققا قىزمەت كورسەتۋ ورتالىقتارىن جاڭعىرتۋدى باستادىق. ءقازىردىڭ وزىندە 8 جاڭا فرونت-وفيس جۇمىس ىستەپ تۇر»، - دەپ جازدى مينيستر.
باعدات ءمۋسيننىڭ مالىمەتىنشە، «Ehealth» ەلەكتروندى دەنساۋلىق ساقتاۋ جۇيەسىن قۇرۋ جۇمىستارى جۇرگىزىلۋدە. ول ازاماتتارعا قىزمەت كورسەتۋ ورنىنا قاراماستان، سىرقاتىنىڭ تاريحى مەن بارلىق دياگنوزدارىن ءبىر بازادا توپتاستىراتىن ۇلتتىق دەنساۋلىق پاسپورتىن قالىپتاستىرۋعا مۇمكىندىك بەرمەك.
«اۋىلدىق مەكتەپتەر ينتەرنەت-ينفراقۇرىلىمىمەن تولىق قامتاماسىز ەتىلگەن. ءبىراق بۇل تۇرعىدا ءالى دە بەلسەندى تۇردە جۇمىس ىستەۋ كەرەكپىز. وقۋشىلار مەن مۇعالىمدەر ينتەرنەتتى وقۋ پروسەسىندە پايدالانا الۋى ءۇشىن مەكتەپىشىلىك ينتەرنەتتى تاراتۋ جەلىلەرىن دامىتۋ قاجەت. جاقىن ارادا وقۋلىقتاردىڭ 100 پايىزى سيفرلاندىرىلاتىن بولادى جانە كوپتەگەن كىتاپتاردى الىپ ءجۇرۋ قاجەتتىلىگى بىرتىندەپ جويىلاتىن بولادى» - دەپ ءمالىم ەتتى باعدات مۋسين.
مينيستر جۇمىستاردىڭ ناتيجەسىن بايانداي كەلە، ارىپتەستەرىن بۇگىنىگى باعدارلاماشىلار كۇنىمەن قۇتتىقتادى.