كوپتەگەن اتا-انالار جىل سايىن مەكتەپ وقۋلىقتارىنا ساي كەلەتىن قاپ تابا الماي قيىندىقتارعا تاپ بولادى.
ءار وقۋ جىلى باستالعاندا اتا-انالار جاڭا قاپتار ساتىپ الۋعا ءماجبۇر. الايدا قاپتاردىڭ ولشەمى كوبىنە كىتاپتارعا سايكەس كەلمەيدى. ارينە، بۇل وتباسىلىق بيۋدجەتكە ايتارلىقتاي اسەر ەتەدى، دەپ حابارلايدى aqshamnews.kz.
وسىعان قاتىستى دەپۋتات، بۇرىنعى ءبىلىم بەرۋ ءمينيسترى اسحات ايماعامبەتوۆ قوزعادى.
ايماعامبەتوۆتىڭ سوزىنە سەنسەك، 2020 جىلى وقۋلىقتاردىڭ فورماتتارىن بىرىزدەندىرۋ تۋرالى شەشىم قابىلدانعان.
«2020 جىلدان كەيىن شىعارىلاتىن وقۋلىقتار ءبىرىڭعاي فورماتتا دايىندالادى، بۇل وقۋلىقتاردى ىڭعايلى ءارى ستاندارتقا ساي ەتەدى»، – دەپ ءتۇسىندىردى دەپۋتات.
دەگەنمەن، 2020 جىلعا دەيىن باسىلىپ شىققان وقۋلىقتار ءالى دە مەكتەپتەردە قولدانىستا. كوپتەگەن ەسكى وقۋلىقتار مەكتەپ كىتاپحانالارىنان ءالى دە الىنىپ تاستالعان جوق.
«ءالى جارامدى وقۋلىقتاردى پايدالانا بەرەمىز، ولاردى لاقتىرىپ تاستامايمىز»، – دەپ اتاپ ءوتتى ايماعامبەتوۆ.
دەپۋتاتتىڭ سوزىنشە، وقۋلىقتاردىڭ ورتاشا پايدالانۋ مەرزىمى شامامەن بەس جىلدى قۇرايدى.
«ءبىلىم مينيسترلىگى جاڭا وقۋ باعدارلامالارىن بەكىتكەننەن كەيىن، وقۋلىقتار جاڭا فورماتقا كەزەڭ-كەزەڭىمەن اۋىستىرىلاتىن بولدى. مەكتەپتەر سىنىپتان سىنىپقا كوشكەن سايىن وقۋلىقتار دا جاڭارتىلادى»، – دەدى دەپۋتات.
بۇل جاڭا شەشىم وقۋلىقتار قاپتارىنا قاتىستى ماسەلەلەردى، سونداي-اق باسقا دا قيىندىقتاردى شەشۋگە كومەكتەسەدى. ايماعامبەتوۆ جاڭا ستاندارتتارعا سايكەس كەلەتىن وقۋلىقتار مەكتەپتەرگە بىرتىندەپ ەنگىزىلەتىنىن جەتكىزدى.
«الداعى ەكى جىل ىشىندە جاڭا وقۋلىقتار دايىن بولادى دەپ ويلايمىن. مينيسترلىك وسى باعىتتا جۇمىستارىن جالعاستىرىپ جاتىر»، – دەپ تۇيىندەدى اسحات ايماعامبەتوۆ.