وقۋ-اعارتۋ مينيسترلىگى مەكتەپ وقۋلىقتارىن تەكسەرەدى

رەسپۋبليكالىق ءبىلىم بەرۋ مازمۇنىن ساراپتاۋ عىلىمي-پراكتيكالىق ورتالىعى Instagram الەۋمەتتىك جەلىسىندە جاريالانعان 6-سىنىپتىڭ «جاراتىلىستانۋ» وقۋلىعى (رەد.«اتامۇرا»، 2018 جىل) تۋرالى بەينەجازباعا قاتىستى جاۋاپ بەردى. بۇل تۋرالى Almaty-akshamy.kz. Elitar.kz-كە سىلتەمە جاساپ حابارلايدى.

«بۇل وقۋلىق مەملەكەتتىك ساراپتامادان ءوتىپ، 2017 جىلى ورىس تىلىندە وقىتاتىن مەكتەپتەردە قولدانۋعا رۇقسات ەتىلگەن. وقۋلىقتى پايدالانعان 6 جىل ىشىندە مەكتەپتەردەن مۇنداي شاعىم تۇسكەن جوق. §33 «جاسۋشا الەمىنە ەكسكۋرسيا» تاقىرىبىنداعى وقۋشىعا بەرىلگەن تاپسىرمادا جاسۋشا ورگانەللالارىنىڭ قىزمەتىنە بايلانىستى قوسىمشا مالىمەت الۋ ءۇشىن ينتەرنەت-رەسۋرستارى جازىلعان. رەسۋرستاردىڭ ءبىرى رەتىندە biofile.ru سايتى كورسەتىلگەن. ساراپتاما كەزىندە بۇل «بيوفيل» عىلىمي-اقپاراتتىق جۋرنالىنىڭ سايتى ەكەنى انىقتالدى. وقۋلىقتارداعى ناقتى ۆەب-رەسۋرستاردى كورسەتۋ بالالاردىڭ اقپاراتتى ىزدەۋ جانە تالداۋ داعدىلارىن دامىتۋعا ىقپال ەتەدى دەپ ەسەپتەلدى. ورتالىقتى تەكسەرۋ بارىسىندا بۇل سايتتىڭ قازىرگى ۋاقىتتا جۇمىس ىستەمەيتىنى انىقتالدى. دەگەنمەن براۋزەرلەردەن سايتتى تەرىپ، ىزدەگەن كەزدە كۇماندى تانىسۋ سايتتارىنا باعىتتايدى. Web.archive.org مۇراعات قىزمەتى ارقىلى جۇرگىزىلگەن تالداۋ سايتتىڭ 2011 جىلدان بەرى جۇمىس ىستەپ كەلە جاتقانىن كورسەتتى. ءبىراق، سوڭعى جىلدارى بەلسەندىلىگى كۇرت تومەندەگەن»، – دەلىنگەن حابارلامادا.

«17 اقپان مەن 9 ناۋرىز ارالىعىندا سايت اكىمشىلىگى جاڭا URL مەكەنجايىن تىركەدى. ورتالىق وقۋشىلاردىڭ اقپاراتتىق قاۋىپسىزدىگىنىڭ ماڭىزىن ەسكەرىپ، قۇقىق قورعاۋ جانە باسقا دا مەملەكەتتىك ورگاندارعا ءتيىستى سۇرانىس جولدادى. سونىمەن قاتار، باسپالارمەن بىرلەسىپ، قولدانىستاعى قاعاز جانە ەلەكتروندى وقۋلىقتارداعى ۆەب-سايتتارعا سىلتەمەلەر تەكسەرىلىپ، مۇعالىمدەر مەن اتا-انالارعا ءتيىستى نۇسقاۋ حاتى راسىمدەلەدى» ، – دەلىنگەن جاۋاپتا.