پاۆلودار جانە جامبىل وبلىستارىنداعى وقىس وقيعالار بۇگىن وبلىس اكىمدەرىنىڭ ورىنباسارلارى، پوليسيا دەپارتامەنتتەرى، ءبىلىم باسقارمالارى، اۋماقتىق دەپارتامەنتتەر مەن ۆەدومستۆولىق باعىنىستى ۇيىم باسشىلارىنىڭ قاتىسۋىمەن وتكەن بالالاردىڭ قاۋىپسىزدىگى ماسەلەلەرىنە ارنالعان شۇعىل كەڭەستە تالقىلاندى.
ءوز بايانداماسىندا بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا وتكەن جىلدىڭ باسىنان باستاپ مينيسترلىك مۇددەلى مەملەكەتتىك ورگاندارمەن بىرلەسىپ ءبىلىم بەرۋ ۇيىمدارىن تەحنيكالىق قاۋىپسىزدىك قۇرالدارىمەن جاراقتاندىرۋ بويىنشا جان-جاقتى جۇمىس اتقارعانىن اتاپ ءوتتى. نورماتيۆتىك-قۇقىقتىق اكتىلەر، بالالاردى قورعاۋ جونىندەگى كەشەندى جوسپار جانە بۋللينگكە قارسى باعدارلاما قابىلداندى. وسىعان دەيىن مەكتەپتەردە پسيحولوگيالىق-پەداگوگيكالىق جۇمىستى كۇشەيتۋ تۋرالى ماسەلە بىرنەشە رەت كوتەرىلدى، ءبىراق بۇل جاعىمسىز جاعدايلار جەرگىلىكتى اتقارۋشى ورگانداردىڭ تاراپىنان جىبەرىلگەن ولقىلىقتاردى كورسەتىپ بەردى.
وقيعا ورىن العان مەكتەپتەردەگى جانە جالپى ءبىلىم بەرۋ ۇيىمدارىنداعى جاعداي مەن قابىلدانعان شارالار تۋرالى پاۆلودار جانە جامبىل وبلىسى اكىمدەرىنىڭ ورىنباسارلارى اقپارات بەردى. وقۋ-اعارتۋ ءمينيسترى پسيحولوگيالىق قىزمەتتەردىڭ جۇمىسىن كۇشەيتۋدىڭ جانە قالعان سەگىز وڭىردە ونى اشۋدى جەدەلدەتۋدىڭ ماڭىزدىلىعىن اتاپ ءوتتى.
«تاعى دا قايتالايمىن، بالالاردىڭ قاۋىپسىزدىگى - ءبىزدىڭ ورتاق مىندەتىمىز. جاعدايدى ءبىرجاقتى باعالاۋعا بولمايدى. ءقازىر وڭىرلەردەگى پسيحولوگيالىق قىزمەتتەردىڭ جۇمىسىن ينستيتۋسيونالدى تۇردە كۇشەيتۋ قاجەت. ءبىلىم بەرۋ ۇيىمدارىنا مامانداندىرىلعان ساپالى كۇزەت قىزمەتىن قويۋ كەرەك. بالالار اراسىنداعى زورلىق-زومبىلىقتىڭ الدىن الۋ جانە قاۋىپسىزدىك شارالارىن قامتاماسىز ەتۋ جۇمىستارىن ناتيجەلى جۇرگىزۋ ماڭىزدى»، - دەپ اتاپ ءوتتى عاني بەيسەمبايەۆ.
ۆەدومستۆو باسشىسى مەكتەپىشىلىك باقىلاۋدى كۇشەيتۋگە جانە ءاربىر مەكتەپكە ۋچاسكەلىك ينسپەكتورلاردى بەكىتۋ ماسەلەسىنە جەكە توقتالدى. بالالاردىڭ قۇقىقتارىن قورعاۋ كوميتەتى اۋماقتىق دەپارتامەنتتەرمەن بىرلەسىپ ءبىلىم وشاقتارىندا مەكتەپىشىلىك ەسەپكە الۋدى جانە پسيحولوگيالىق-پەداگوگيكالىق سۇيەمەلدەۋدى ساپالى قامتاماسىز ەتۋى قاجەت.