قازاقستاندا بيولوگيا پانىنەن حالىقارالىق IBO-2024 وليمپياداسىنا دايىندىق ءجۇرىپ جاتىر.
وليمپياداعا الەمنىڭ 81 ەلىنەن 300-دەن استام وقۋشى جانە 500-دەن استام عىلىمي جەتەكشى مەن قوناقتار كەلەدى دەپ كۇتىلۋدە، دەپ حابارلايدى Almaty-akshamy.kz وقۋ-اعارتۋ مينيسترلىگىنىڭ باسپا ءسوز قىزمەتى.
IBO-2024 بيىلعى جىلدىڭ 7-14 شىلدەسى ارالىعىندا نازاربايەۆ ۋنيۆەرسيتەتى بازاسىندا تەوريالىق جانە 4 پراكتيكالىق تۋر (بيوحيميا، مولەكۋلالىق بيولوگيا، بيوينفورماتيكا، جانۋارلار اناتومياسى جانە فيزيولوگياسى) بويىنشا وتكىزىلەدى.
قازاقستاندىق جاس عالىمدار مەن وتكەن حالىقارالىق وليمپيادالاردىڭ جەڭىمپازدارىنان تۇراتىن IBO-2024 عىلىمي كوميتەتى پراكتيكالىق جانە تەوريالىق تۋرلارعا تاپسىرمالار ازىرلەپ، وسى جىلدىڭ ناۋرىز ايىندا سترەسس-تەست جۇرگىزدى.
«بيولوگيادان حالىقارالىق وليمپيادانى جوعارى دەڭگەيدە وتكىزۋ ماقساتىندا قزاقستان رەسپۋبليكاسى ۇكىمەتىنىڭ بىرلەسكەن قاۋلىسى قابىلداندى. الەمنىڭ 81 ەلىنەن كەلگەن وقۋشىلار ەلوردانىڭ مادەني ورىندارىن ارالايدى جانە قازاقستاننىڭ ءىنجۋ-مارجانى – بۋرابايعا بارادى. سونداي-اق كوماندا جەتەكشىلەرى كاسىبي تاجىريبە الماسۋعا، وليمپيادانى ۇيىمداستىرۋ مەن وتكىزۋگە ارنالعان سەمينارلار مەن كونفەرەنسيالارعا قاتىسا الادى»، - دەيدى «دارىن» رعپو ديرەكتورى عاجدەمبەك تۇرسىنوۆ.
انىقتاما ءۇشىن: بيولوگيا پانىنەن حالىقارالىق وليمپيادا (IBO) – الەم ەلدەرىنىڭ جوعارى سىنىپ وقۋشىلارى اراسىنداعى ەڭ اۋقىمدى جارىس. قازاقستاندىق وقۋشىلار عىلىمي جارىسقا 1996 جىلدان بەرى قاتىسىپ كەلەدى. وسى ۋاقىت ىشىندە ولار 2 التىن، 20 كۇمىس، 54 قولا مەدال جانە 14 قۇرمەت گراموتاسىن جەڭىپ الدى، بۇل جوعارى كورسەتكىش بولىپ سانالادى. قازاقستاننىڭ وسىنداي بەدەلدى ءىس-شارانى وتكىزۋ ورنى رەتىندە تاڭدالۋى دا سوندىقتان.