تاراپتار وسكەلەڭ ۇرپاقتى اسكەري-پاتريوتتىق تاربيەلەۋ جانە بالالار مەن وقۋشىلاردىڭ بوس ۋاقىتىن ماعىنالى ۇيىمداستىرۋ سالاسىنداعى ىنتىماقتاستىق پەرسپەكتيۆالارىن تالقىلادى.
ولار بۇدان بولەك قاپشاعاي سۋ قويماسىنىڭ جاعاسىندا ورنالاسقان «التىن ەمەل» كەشەنىن وسىنداي ماقساتقا پايدالانۋ جونىندەگى ۆەدومستۆولار اراسىنداعى شارتتى ۇزارتۋ جايىن قوزعادى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
قورعانىس ۆەدومستۆوسىنىڭ باسشىسى بۇگىنگى تاڭدا «التىن ەمەل» اۋماعىندا وقۋ-ساۋىقتىرۋ ورتالىعى تولىق جۇمىس ىستەمەيتىنىن اتاپ ءوتتى. ول قونايەۆ قالاسىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعى فيليالىنىڭ نىساندارىن جوندەۋگە، سپورت الاڭدارى مەن تاعى ءبىر اسحانا سالۋعا كومەك كورسەتۋدى ۇسىندى.
مينيسترلەر «بالداۋرەن» روسو-نىڭ ءتورت فيليالىندا اسكەري قىزمەتشىلەر مەن قارۋلى كۇشتەر قىزمەتكەرلەرىنىڭ بالالارىنا دەمالۋ، سونداي-اق ەرەكشە ءبىلىم بەرۋدى قاجەت ەتەتىن بالالاردى وڭالتۋعا كۆوتالار ءبولۋ مۇمكىندىگىن دە تالقىلادى.
«جاس سارباز قوزعالىسى ءبىزدىڭ قولداۋىمىزدىڭ ارقاسىندا دامىپ، جۇمىس ىستەپ كەلەدى. ءار گارنيزونداعى بۇل بالالار وسى وقۋ-ساۋىقتىرۋ ورتالىقتارىنا ءوز قاتارلاستارىن بىلۋگە، دەمالۋعا، وقۋ الدىندا كۇش-قۋات جيناپ، تىنىعۋعا كەلە الادى، – دەدى گەنەرال-پولكوۆنيك رۋسلان جاقسىلىقوۆ. – بۇل مەملەكەتتىڭ ناقتى قولداۋى بولماق جانە ءبىز ءوز تاراپىمىزدان قىزمەتتىڭ وزگە دە باعىتتارى بويىنشا كومەكتەسۋگە دايىنبىز».
وقۋ-اعارتۋ ءمينيسترى عاني بەيسەمبايەۆ ءوز كەزەگىندە «بالداۋرەن» روسو بارلىق فيليالدارىندا اسكەري قىزمەتشىلەردىڭ بالالارىن ساۋىقتىرۋعا ارنالعان كۆوتا تۋرالى ۇسىنىستى قولدادى. ءسوز بارىسىندا ول اسكەري بولىمدەردىڭ ەسىكتەرى بالالاردىڭ الدىندا ءجيى اشىلا باستاعانىن اتاپ ءوتتى.
«ءبىز ءقازىر اسكەري بولىمدەردە اشىق ەسىك كۇندەرىنىڭ جۇيەلى تۇردە وتكىزىلىپ جاتقانىن بايقاپ وتىرمىز. مەكتەپ ءبىتىرۋشى سىنىپ وقۋشىلارىن اسكەري-پاتريوتتىق تاربيە سالاسىنا بەلسەندى تارتۋ، ولاردى ارميانىڭ كۇندەلىكتى ومىرىمەن تانىستىرۋ قاجەت»، – دەپ اتاپ ءوتتى ول.
مينيستر عاني بەيسەمبايەۆ بالالارمەن جانە جاسوسپىرىمدەرمەن جۇمىس ىستەۋگە العاشقى اسكەري دايىندىعىن ۇيىمداستىرۋشى وقىتۋشىلار رەتىندە اسكەري زەينەتكەرلەردىڭ قاتىسۋىنا قولداۋ ءبىلدىردى.
كەزدەسۋ قورىتىندىسى بويىنشا تاراپتار ءتيىستى مەموراندۋم جاساسۋ جانە بالالار مەن وقۋشىلارعا اسكەري-پاتريوتتىق تاربيە بەرۋ بويىنشا بىرلەسكەن جۇمىس جوسپارىن جاساۋ جونىندە جۇمىس جۇرگىزۋگە شەشىم قابىلدادى. ەكى مينيسترلىكتىڭ ىنتىماقتاستىعى اشىق ەسىك كۇندەرىن وتكىزۋدى، «بالداۋرەن» روسو فيليالدارىندا ۇيىرمەلەر، سپورت سەكسيالارىن اشۋدى جانە سىنىپتاردى تاقىرىپتىق بەزەندىرۋدى كوزدەيدى. بۇل باعىتتا جۇمىس ءارى قاراي جالعاساتىنىن ايتا كەتكەن ءجون.