تەرگەۋ امالدارى ءجۇرىپ جاتىر.
«وپەراتور روپ» اتتى جاۋاپكەرشىلىگى شەكتەۋلى سەرىكتەستىكتىڭ باسقارۋشى ديرەكتورى رۋسلان شامشييەۆ وز-وزىنە قول جۇمساعان، دەپ حابارلايدى Almaty-akshamy.kz Informburo.kz سايتىنا سىلتەمە جاساپ.
ونىڭ قايتىس بولعانى تۋرالى اقپارات العاشىندا الەۋمەتتىك جەلىلەردە پايدا بولعان. سوڭىنان نۇر-سۇلتان قالالىق پوليسيا دەپارتامەنتىندە Informburo.kz سايتىنىڭ رەداكسياسى بۇل دەرەكتى راستاعان.
«ەر ادامنىڭ ءمايىتىن تابۋ فاكتىسى بويىنشا ەسىل اۋدانىنىڭ پوليسيا ءبولىمى ق ر قىلمىستىق كودەكسىنىڭ 105-بابى «ءوزىن-وزى ولتىرۋگە يتەرمەلەۋ» بويىنشا قىلمىستىق ءىس قوزعادى. قازىرگى ۋاقىتتا تەرگەۋدىڭ تولىقتىعى مەن وبەكتيۆتىلىگىن قامتاماسىز ەتۋ ماقساتىندا قاجەتتى تەرگەۋ امالدارى جۇرگىزىلىپ جاتىر»، - دەدى پوليسياداعىلار.
رۋسلان شامشييەۆ «وپەراتور روپ» ءجشس-نىڭ قۇقىقتىق ماسەلەلەر جونىندەگى باسقارۋشى ديرەكتورى بولىپ 2021 جىلى كەلگەن. بۇعان دەيىن ول «ازاماتتارعا ارنالعان ۇكىمەت» مەملەكەتتىك كورپوراسياسىندا ءتۇرلى قىزمەتتەردە ىستەگەن.