قويىلىم كورەرمەنگە 4 قاراشا كۇنى ساعات 19.00-دە ۇسىنىلادى.
اباي اتىنداعى قازاق ۇلتتىق وپەرا جانە بالەت تەاترىندا قاجىم جۇمالييەۆتىڭ ليبرەتتوسىنا جازىلعان مۇقان تولەبايەۆتىڭ «ءبىرجان – سارا» سپەكتاكلىنىڭ قويىلىمىنا 75 جىل تولۋىنا وراي جانە ديريجەر، ق ر ەڭبەك سىڭىرگەن قايراتكەرى رايسا سادىقوۆانى ەسكە الۋعا ارنالعان سپەكتاكل وتەدى، دەپ حابارلايدى Almaty-akshamy.kz
«ءبىرجان – سارا» وپەراسى وتاندىق مۋزىكا مادەنيەتىنىڭ تاريحىندا ەرەكشە ورىن الادى. ونىڭ پرەمەراسى 1946 جىلى اباي اتىنداعى وپەرا جانە بالەت تەاترىنىڭ ۇلكەن ساحناسىندا ءوتتى. سيۋجەتتىڭ نەگىزىندە كورنەكتى اقىن، انشى-كومپوزيتور ءبىرجان سال (ءبىرجان قوجاعۇلوۆ) مەن جاس تالانتتى پوەتەسسا سارا تاستانبەك قىزى ءومىرىنىڭ شىنايى تاريحى جاتىر.
«ءبىرجان – سارا» وپەراسىندا وتكەن ءجۇزجىلدىقتىڭ باستاپقى كەزەڭى قايتا جاڭعىرتىلعان. قويىلىمدا بايدىڭ وزبىرلىعى ماسەلەسى كوتەرىلگەن، وسى رەتتە باستى كەيىپكەرلەر ءبىرجان مەن سارانىڭ جارقىن ماحابباتى، ولاردىڭ رۋحاني كۇشى مەن فەودالدىق قوعامعا قارسى تۇرۋى ايقىنىراق كورىنەدى. مۋزىكا قازاقستاندا كلاسسيكالىق وپەرا ونەرىنىڭ دامۋىنا نەگىز بولعان ۇلتتىق ەپوس پەن فورمالاردىڭ ورگانيكالىق قوسپاسىن ۇسىنادى. ءبىرجان مەن سارانىڭ ماحاببات تاريحى قايعىلى، ءبىراق ول حالىقتىڭ جۇرەگىندە ماڭگى قالادى. ءبىرجاننىڭ اندەرىن عاشىقتاردىڭ جاڭا ۇرپاقتارى شىرقايدى. قويىلىم كورەرمەنگە 4 قاراشا كۇنى ساعات 19.00-دە ۇسىنىلادى.
ال، 5 قاراشا ساعات 19.00-دە تەاتر ساحناسىندا ءبىر اكتىلى بالەتتەردىڭ كەشى وتەدى. كورەرمەنگە ۇسىناتىن العاشقى قويىلىم جورج بيزەنىڭ «كارمەن» وپەراسى نەگىزىندە قويىلعان حورەگراف البەرتو الونسونىڭ «كارمەن-سيۋيتا» ءبىر اكتىلى بالەتى. «كارمەن-سيۋيتانى» قويۋ يدەياسى كارمەن ءرولىن سومداۋدى ارمانداعان اتاقتى بالەرينا ماييا پليسەسكاياعا تيەسىلى. بيزەنىڭ شىعارماسىن نەگىزگە الا وتىرىپ، ششەدرين بالەت ليبرەتتوسىن مەريمەنىڭ رومانىنا ەمەس، الەمگە تانىمال وپەراعا سۇيەنە وتىرىپ جازعان. وقيعا سىعان قىزى كارمەن مەن ونى شىنايى سۇيگەن سارباز حوزەنىڭ قايعىلى تاعدىرى جايلى، الايدا كارمەن تورەرو ەسىمدى جاس جىگىت ءۇشىن حوزەنى تاستاپ كەتەدى. حوزەنىڭ قولىنان قازا تاپقان كارمەن ءولىمى جانە كەيىپكەرلەر اراسىنداعى قارىم-قاتىناس سىناق، كوتەرىلىس، قارسى تۇرۋ سىندى ارەكەتتەرمەن انىقتالادى.
شاحرياردىڭ جاس ايەلدەرىن ولىمنەن قۇتقارعان حانشايىم شەحەرەزادانىڭ شەشەندىگى تۋرالى باياندايتىن «مىڭ ءبىر ءتۇن» ەرتەگىسىنىڭ سيۋجەتىندەگى «شەحەريزادا» بالەتى. سيمفونيالىق وركەستر اۋەنىمەن ميحايل فوكيننىڭ ن. ريمسكيي-كورساكوۆتىڭ مۋزىكاسىنا قويعان قويىلىمىنىڭ شىعىس قۇمارلىقتارى مەن كولوريتىن كورەرمەندەرگە بالەت ترۋپپاسىنىڭ جەتەكشى سوليستەرى ۇسىنادى. «شەحەريزادا» بالەتىن اباي ات. قازۇوبت لوندون كوليزەيىندەگى (Coliseum Theatre) گاسترولدەردە اعىلشىن قاۋىمىنا ۇسىنعان بولاتىن.
6 قاراشادا ساعات 18.00-دە پ.ي. چايكوۆسكييدىڭ «يولانتا» ليريكالىق ءبىر اكتىلى وپەراسى وپەرا تەاترىنىڭ ۇلكەن ساحناسىندا ورىندالادى. پەتر يليچ ءوز جۇمىسىن جازعان كەزدە، ول: «يا ناپيشۋ تاكۋيۋ وپەرۋ، چتو ۆسە بۋدۋت پلاكات» - دەگەن ەدى. شىن مانىندە دە، كورەرمەن بۇكىل سپەكتاكل بويى الاڭداۋمەن بولادى، سيۋجەت باستى كەيىپكەرلەر - حاس سۇلۋ يولانتا مەن ونىڭ سۇيىكتىسى روبەرتكە دەگەن شيەلەنىس پەن جاناشىرلىق سەزىمدە «ۇستايدى». دەگەنمەن، سيرەك جاعدايلاردى قوسپاعاندا، «يولانتا» وپەراسىنىڭ سوڭىندا Happy End كۇتەدى.