كۇنى كەشە الماتى جۇرتشىلىعى «حان سۇلتان. التىن وردا» وپەراسىنىڭ پرەمەراسىن تاماشالاعانى تۋرالى جازعان ەدىك. سول پرەمەراسىنا ارنايى بارعان تىلشىلەرىمىز شاعاتاي رولىندە ويناۋشى اكتەر يسلام حامزايەۆتىڭ پىكىرىن جازىپ العان ەدى.
«وپەرا تەاترىندا بۇگىن – تاريحي ءسات. تاريحي وقيعاعا قۇرىلعان، ەل باسىنا كۇن تۋعان سوناۋ قيىن شاقتىڭ تاعدىرى ساحنالاندى. ۇرگەنىشتىڭ قيراۋى جوشى حاننىڭ التىن وردانى قۇرۋى. ءبىر سوزبەن ايتقاندا، شىڭعىس ۇرپاقتارى اراسىندا حاندىق ينتريگانىڭ بولۋى باياندالىپ، باجايلاندى. وپەرادا شىڭعىس حان ۇرپاقتارىنىڭ قانداي بولعاندىعى، ولاردىڭ بىر-بىرىنە قارىم-قاتىناسى، كەزدەسكەن ساتتەرى، وسىنىڭ ءبىرى-بارى وپەرانىڭ ونەبويىنان كورىنىس تاپتى»، – دەيدى اكتەر يسلام حامزايەۆ.
«شاعاتاي –– شىڭعىس حاننىڭ ەڭ سۇيىكتى ۇلى. ول – شاعاتاي ون ءتورت جاسىنان اكە جولىن قۋىپ، ءوزىن بيلىككە لايىقتى ادام ەكەنىن كورسەتە بىلگەن جان. وپەراعا دايىندالعان كەزدە شىڭعىس ۇرپاقتارىن وزىمشە زەرتتەپ، زەردەلەدىم. شاعاتاي دەگەن كىم؟ نە ءۇشىن جوشىمەن جاعالاستى؟ جوشىعا «مەركىتتىڭ ۇرپاعى» دەپ ايتىپ قالىپ، ارازداسقان كەزى دە بار» دەيدى يسلام.
«ۇرگەنىش حالقىن قىرىپ تاستاعان شاعاتاي. جوشى – شاعاتايعا قاراعاندا، جۇرەگى جۇمساق ادام. ال، شاعاتاي بولسا، تىم قاتال. اكەسى شىڭعىس نەنى ايتسا، سونى ورىندايتىن بولعان. بۇگىنگى قويىلىمدا شاعاتاي بەينەسى وزگەشە قىرىنان كورىندى. ول – تاريح ساحناسىنداعى ۇلى تۇلعا. تاباناستى دۇنيەلەردى ويلاپ تاۋىپ، اقىرى وپىق جەيتىن كەزدەرىم بار»، – دەيدى اكتەر.
«شاعاتاي – ۇلى تۇلعا. ونىڭ بويىنداعى وجەت مىنەز بۇگىنگى قازاقتاردىڭ دا بويىندا بار. وعان ەلىكتەيتىندەردىڭ بارىن جوققا شىعارمايمىز. ونىڭ مىنەزىندە ىسكە تۋرا، باتىل بارۋ باسىمداۋ. بۇل قاسيەت تە ءار قازاقتىڭ بويىندا بار. ءبىراق، شاعاتاي سىقىلدى قانىپەزەر بولۋدىڭ قاجەتى جوق.
باتىر دا مىقتى ادامنىڭ، البەتتە، وسال تۇسى دا بولادى. ونىسى ايەلگە دەگەن كوزقاراسىنان بايقالادى. وسىنى ءتۇسىنۋ ماعان ءبىراز قيىندىق تۋعىزعانى بار. شاعاتايدى زەردەلەۋ بارىسىندا بۇعان دا كوز جەتكىزدىم»، – دەدى اكتەر ي.حامزايەۆ.