وسى باعىتتا جۇمىستى كۇشەيتۋ تاپسىرىلدى.
قازاقستان ۇكىمەتى الداعى ۆەگەتاسيالىق كەزەڭدە وڭتۇستىك وڭىرلەرىنىڭ اۋىل شارۋاشىلىعى تاۋارىن وندىرۋشىلەرىن سۋارمالى سۋمەن قامتاماسىز ەتۋ ماسەلەلەرىنە ارنالعان كەڭەس وتكىزدى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
شارا باراسىندا ەكولوگيا، گەولوگيا جانە تابيعي رەسۋرستار، اۋىل شارۋاشىلىعى، ەنەرگەتيكا مينيسترلەرى، سونداي-اق قىزىلوردا، تۇركىستان جانە جامبىل وبلىستارىنىڭ باسشىلىعى ارال-سىرداريا باسسەينىندە قالىپتاسقان جاعداي تۋرالى باياندادى.
بيىل سۋدىڭ از كەلۋىنە بايلانىستى قىرعىز رەسپۋبليكاسىنىڭ اۋماعىنداعى توقتوعۇل سۋ قويماسىنا جينالعان سۋدىڭ كولەمى وتكەن جىلعى دەڭگەيگە جەتپەيدى. قىرعىزستاننىڭ ءوزىنىڭ سۋ-ەنەرگەتيكالىق قاجەتتىلىكتەرىن قامتاماسىز ەتۋى ءتيىس ەكەنىن ەسكەرە وتىرىپ، قازاقستان اۋماعىنا جىبەرىلەتىن سۋ كولەمىنىڭ تومەندەۋ ءقاۋپى بار.
پرەمەر-مينيستر ءاليحان سمايىلوۆ ەكولوگيا، گەولوگيا جانە تابيعي رەسۋرستار، سونداي-اق ەنەرگەتيكا مينيسترلىكتەرىنە كوكتەمگى-جازعى كەزەڭدە ەلىمىزدىڭ وڭتۇستىك وڭىرلەرىنىڭ سۋارمالى جەرلەرىن سۋمەن قامتاماسىز ەتۋ ءۇشىن تۇبەگەيلى شارالار قابىلداۋدى تاپسىردى. ءاليحان سمايىلوۆ ترانسشەكارالىق وزەندەردىڭ رەسۋرستارىن پايدالانۋ بويىنشا ءوزارا ءتيىمدى شەشىمدەر قابىلداۋ ءۇشىن قىرعىزستانمەن جانە وزبەكستانمەن قارقىندى كەلىسسوزدەر جۇرگىزۋ قاجەت ەكەنىن اتاپ ءوتتى. اۋىل شارۋاشىلىعى مينيسترلىگىنە سۋ ۇنەمدەۋ تەحنولوگيالارىن جانە اگرارلىق سالادا سۋ رەسۋرستارىن ءتيىمدى پايدالانۋدىڭ باسقا دا قۇرالدارىن ەنگىزۋ اياسىنداعى جۇمىستى كۇشەيتۋ تاپسىرىلدى.
