ۋاقىتشا شەكتەۋلەردى الىپ تاستاۋ تۋرالى شەشىم قابىلداندى.
قازاقستان پرەمەر-مينيسترىنىڭ ورىنباسارى ەرالى توعجانوۆتىڭ توراعالىعىمەن قازاقستان رەسپۋبليكاسىنىڭ اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى، دەپ حابارلايدى Almaty-akshamy.kz.
ۆاك وتىرىسىندا قازاقستاندىق جانە شەتەلدىك ازاماتتاردىڭ قازاقستان رەسپۋبليكاسىنىڭ مەملەكەتتىك شەكاراسىن كەسىپ ءوتۋ ءتارتىبىن جەڭىلدەتۋ ماسەلەلەرى تالقىلاندى.
ناتيجەسىندە، ۆەدومستۆوارالىق كوميسسيا ۋاقىتشا شەكتەۋلەردى الىپ تاستاۋ تۋرالى شەشىم قابىلدادى:
- قازاقستان رەسپۋبليكاسى ازاماتتارىنىڭ قازاقستان رەسپۋبليكاسىنىڭ حالىقارالىق اۋەجايلارى ارقىلى شەت مەملەكەتتەرگە شىعۋىنا؛
- ۆيزالىق تالاپتار ساقتالعان جاعدايدا شەتەلدىكتەرگە ۆيزاسىز رەجيمى بار ەلدەردەن، سونداي-اق تىكەلەي اۋە قاتىناسى بار ەلدەردەن (تۇراقتى، تۇراقتى ەمەس چارتەرلىك رەيستەر) قازاقستان رەسپۋبليكاسىنىڭ اۋماعىنا/اۋماعى ارقىلى كىرۋگە/ترانزيتتىك وتۋگە.
سونداي-اق قازاقستان رەسپۋبليكاسىنىڭ ازاماتتارى ءۇشىن اۆتووتپە جولدارى ارقىلى شەت مەملەكەتتەرگە شىعۋ ءۇشىن شەكتەۋ مەرزىمى ەكى ەسە ازايتىلدى، ەندى قازاقستاندىقتار 15 تاۋلىكتە 1 رەت شىعا الادى.
ەلگە كىرۋ كەزىندەگى جالعىز تالاپ – شەتەلدەن كەلگەندەردىڭ بارلىعى ۆاكسيناسيادان وتۋىنە قاراماستان 72 ساعات ىشىندە جارامدى كوروناۆيرۋستىڭ تەرىس پتر تەستى تۋرالى انىقتامانى ۇسىنۋى كەرەك. ەرىپ جۇرەتىن ادامداردا تەرىس تەست تۋرالى قۇجات بولعان كەزدە، 5 جاسقا دەيىنگى بالالاردان انىقتاما تالاپ ەتىلمەيدى.
«بۇل شارالار ەكونوميكالىق قىزمەتتى جانداندىرۋعا، وتاندىق تۋريستىك بيزنەستى دامىتۋعا جانە ەلدىڭ ينۆەستيسيالىق احۋالىن جاقسارتۋعا باعىتتالعان. مەملەكەت باسشىسى قاسىم-جومارت توقايەۆ 21 قاڭتاردا بيزنەس وكىلدەرىمەن كەزدەسۋ بارىسىندا ۇكىمەتكە كوروناۆيرۋستىق ينفەكسيانىڭ تارالۋىنا جول بەرمەۋ بويىنشا كارانتيندىك شارالاردى قولدانۋ تاسىلدەرىن قايتا قاراۋدى تاپسىرعان بولاتىن»، - دەلىنگەن ۆاك مالىمەتىندە.
