قازاقستان رەسپۋبليكاسى ۇلتتىق ۇلان «وڭتۇستىك» وڭىرلىك قولباسشىلىعىنىڭ 500-دەن استام جاۋىنگەرى ەلىمىزدىڭ باتىس وڭىرىندەگى سۋ باسقان ەلدى مەكەندەرگە كومەك كورسەتۋگە جىبەرىلدى.
كەشە سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى سالدارىن جويۋ جونىندەگى رەسپۋبليكالىق شتابتىڭ جۇمىس كەڭەسى ءوتتى. كۇن تارتىبىندە سۋ تاسقىنىنىڭ ەكىنشى تولقىنى بولۋى مۇمكىن باتىس وڭىرلەردەگى جاعداي باستى ماسەلە رەتىندە قارالدى.
پرەمەر-مينيستر ولجاس بەكتەنوۆتىڭ تاپسىرماسى بويىنشا اتىراۋ، باتىس قازاقستان جانە سولتۇستىك قازاقستان وبلىستارىنىڭ تۇرعىندارىنا كومەكتەسۋ ءۇشىن ۇلتتىق ۇلاننىڭ كۇشتەرى مەن قۇرالدارى جىبەرىلۋدە. ۇكىمەت باسشىسى وبلىس اكىمدىكتەرىنە كەلەتىن اسكەري قىزمەتشىلەردى بارلىق قاجەتتى زاتتارمەن قامتاماسىز ەتۋدى، سونداي-اق تەحنيكاعا جانارماي قۇيۋ ماسەلەسىن شەشۋدى تاپسىردى.
ورال قالاسىندا قىزمەت اتقارىپ جاتقان جەكە قۇرام مەن تەحنيكالارعا قوسىمشا 6506 (شىمكەنت ق.) اسكەري بولىمىنەن 300 اسكەري قىزمەتشى مەن 15 اۆتوموبيل جانە 5547 (قىزىلوردا ق.) اسكەري بولىمىنەن 200 سارباز بەن 7 تەحنيكا كومەككە جىبەرىلدى. ولار ورال قالاسىنا دەيىن تەمىر جول كولىگىمەن 1500 شاقىرىمنان استام جول ءجۇرىپ وتەدى. «وڭتۇستىك» وڭىرلىك قولباسشىلىعىنىڭ اسكەري بولىمىنەن جاساقتالعان سۋ تاسقىنى زارداپتارىن جويۋ جونىندەگى جيىنتىق وتريادىن «وڭتۇستىك» وڭىرلىك قولباسشىلىعى قولباسشىسىنىڭ تەحنيكا جانە قارۋ-جاراق جونىندەگى ورىنباسارى يگور پوپوۆسكيي باسقاردى.
ايتا كەتەيىك، جالپى العاندا، ۇلتتىق ۇلاننىڭ 2700-دەن استام جاۋىنگەرى مەن 120 تەحنيكاسى جانە اۆيا ترانسپورتتارى ەلىمىزدىڭ بارلىق سۋ باسقان وڭىرلەرىندە بەلسەندى كومەك كورسەتىپ جاتىر. ولار سۋ باسقان كەنتتەر مەن قالالاردا پاترۋلدەۋ ارقىلى تۇرعىنداردىڭ جەكە مۇلىكتەرىن قورعاۋدى قامتاماسىز ەتۋدە، جاعالاۋدى نىعايتۋ جۇمىستارىنا قاتىسۋدا، سۋ تاسقىنى بولعان ەلدى مەكەندەردە سۋ بۇرۋدى جانە كانالداردى تازارتۋدى جۇزەگە اسىرۋدا. بۇدان بولەك ادامداردى، جانۋارلاردى ءقاۋىپسىز جەرلەرگە ەۆاكۋاسيالاۋ جۇمىستارىمەن دە شۇعىلدانىپ ءجۇر.